12526 عبداللہ بن عبید بن عمیر سے مروی ہے کہ ان کے والد نے حضرت عبداللہ بن عمر (رض) سے سوال کیا : کیا بات ہے کہ آپ ان دو رکنوں حجرا سود اور رکن یمانی کے علاوہ کسی اور رکن کا استلام نہیں کرتے ؟ حضرت ابن عمر (رض) نے ارشاد فرمایا : میں ایسا کرتا ہوں تو میں نے رسول اللہ (صلی اللہ علیہ وآلہ وسلم) سے سنا ہے، ارشاد فرمایا : ان دونوں کا استلام کرنا گناہوں کو مٹا دیتا ہے، نیز میں نے آپ (صلی اللہ علیہ وآلہ وسلم) کو ارشاد فرماتے ہوئے سنا ہے : جس نے ایک ہفتے بیت اللہ کا طواف کیا (غالباً ہفتے سے صرف سات چکرمراد ہیں) اور ان کو شمار کیا پھر دو رکعت نماز پڑھی اس نے گویا ایک جان آزاد کردی اور بندہ (اس عمل کے دوران) جب بھی کوئی قدم رکھتا ہے یا اٹھاتا ہے تو اس کے بدلے اس کے لیے ایک نیکی لکھی جاتی ہے اور ایک گناہ مٹا دیا جاتا ہے اور ایک درجہ بلند کردیاجاتا ہے۔ ابن زنجویہ