12609 عبیداللہ بن ابی رافع سے مروی ہے، وہ ابورافع (رض) سے روایت کرتے ہیں، ابورافع فرماتے ہیں کہ عرفہ کی رات رسول اللہ (صلی اللہ علیہ وآلہ وسلم) نے فضل بن عباس اور اسامہ بن زید کو اپنا ردیف بنایا اور فرمایا یہ موقف (کھڑے ہونے کی جگہ) ہے اور عرفہ سارا موقف ہے۔ لیکن بطن عرفہ سے دور رہو۔ عرفہ کے روز جب سورج غروب ہوگیا تو رسول اللہ (صلی اللہ علیہ وآلہ وسلم) پہلی (آہستہ) رفتار پر چلے جبکہ لوگ دائیں اور بائیں چل رہے تھے۔ اور حضور اکرم (صلی اللہ علیہ وآلہ وسلم) دائیں بائیں متوجہ ہو کر ارشاد فرما رہے تھے : اے لوگو ! سکون ووقار کو اپناؤ۔ حتیٰ کہ حضور (صلی اللہ علیہ وآلہ وسلم) مزدلفہ پہنچ گئے۔ وہاں حضور (صلی اللہ علیہ وآلہ وسلم) نے مغرب اور عشاء کی نماز کو جمع فرمایا۔ جب مزدلفہ میں صبح ہوگئی تو وہاں سے رسول اللہ (صلی اللہ علیہ وآلہ وسلم) کوچ فرمانے لگے پہلے قزح پر کھڑے ہوگئے اور فضل بن عباس کو ردیف بنایا۔ پھر ارشاد فرمایا : یہ موقف ہے اور سارا مزدلفہ موقف ہے لیکن بطن محسر سے دور رہو۔ پھر رسول اللہ (صلی اللہ علیہ وآلہ وسلم) نے کوچ فرمایا جبکہ صبح روشن ہوچکی تھی۔ آپ نرم رفتار سے چل رہے تھے لوگ دائیں بائیں چل رہے تھے۔ رسول اللہ (صلی اللہ علیہ وآلہ وسلم) دائیں بائیں متوجہ ہو کر فرما رہے تھے : اے لوگو ! سکینہ اپناؤ (سکون کے ساتھ چلو) حتیٰ کہ آپ وادی بطن محسر میں پہنچ گئے وہاں آپ نے سواری کو تیز حرکت دی حتیٰ کہ جب وادی بطن محسر کو عبور کر گئے تو سواری کو پہلی رفتار پر لوٹا دیا۔ جب جمرہ عقبہ پر پہنچے تو اس کو سات کنکریاں ماریں۔ پھر حتعم قبیلے کی ایک لڑکی آئی اور بولی : یا رسول اللہ ! میرے والد بوڑھے آدمی ہیں اور ان پر حج فرض ہوچکا ہے کیا میں ان کی طرف سے حج کرسکتی ہوں ؟ حضور (صلی اللہ علیہ وآلہ وسلم) نے ارشاد فرمایا : ہاں۔ فضل (جو حضور کے پیچھے بیٹھے ہوئے تھے) وہ خوبصورت جوان تھے۔ جب لڑکی آئی تو حضور (صلی اللہ علیہ وآلہ وسلم) نے ان کا چہرہ دوسری طرف پھیر دیا پھر رسول اللہ (صلی اللہ علیہ وآلہ وسلم) نے وہاں سے کوچ فرمایا حتیٰ کہ بیت اللہ تشریف لائے اور بیت اللہ کا سات مرتبہ طواف کیا۔ پھر زمزم پر گئے تو آپ کے پاس زمزم کا پانی کا ڈول بھر کر لایا گیا آپ نے وضو فرمایا اور پھر ارشاد فرمایا : اے بنی عبدالمطلب تم (زمزم کے) ڈول بھر کر نکالو۔ اگر لوگوں کے (میری اتباع کی وجہ سے) تم پر اژدھام کردینے کا ڈر نہ ہوتا تو میں خود ڈول نکالتا۔ حضرت عباس (رض) نے آپ سے پوچھا : یارسول اللہ ! میں نے آپ کو دیکھا کہ آپ نے اپنے چچا (یعنی میرے بیٹے) فضل کا چہرہ (کیوں) پھیر دیا تھا۔ حضور (صلی اللہ علیہ وآلہ وسلم) نے فرمایا : میں نے نوجوان لڑکی اور اس نوجوان لڑکے کو دیکھا تو مجھے ڈر ہوا کہ کہیں دونوں کے بیچ میں شیطان نہ گھس جائے۔ ابن جریر