12614 عبداللہ بن عباس (رض) (اپنے والد) حضرت عباس بن عبدالمطلب سے روایت کرتے ہیں کہ جب عرفہ کا روز تھا اور فضل بن عباس حضور (صلی اللہ علیہ وآلہ وسلم) کے ردیف تھے اور حضور (صلی اللہ علیہ وآلہ وسلم) کے چاروں طرف لوگوں کا اژدھام تھا۔ حضرت عباس (رض) فرماتے ہیں جب لوگ بہت زیادہ جمع ہوگئے تو میں نے فضل کو کہا کہ بتاؤ رسول اللہ (صلی اللہ علیہ وآلہ وسلم) کا طرز عمل کیا رہا ؟ تو انھوں نے عرض کیا : جب عرفہ کی رات ہوئی تو رسول اللہ (صلی اللہ علیہ وآلہ وسلم) واپس ہوئے اور لوگ بھی آپ کے ساتھ واپس ہوئے۔ رسول اللہ (صلی اللہ علیہ وآلہ وسلم) اپنے اونٹ کے سر کو (لگام سے) کھینچ رہے تھے اور اس کو روک رہے تھے اور آپ (صلی اللہ علیہ وآلہ وسلم) فرما رہے تھے : اے لوگو ! اطمینان سکون کو اپناؤ۔ بھر جب مزدلفہ پہنچ گئے تو وہاں اترے اور مغرب و عشاء کی نمازیں ادا فرمائیں پھر رات وہیں بسر فرمائی جب صبح کو فجر کی نماز پڑھ لی تو مشعرالحرام کے پاس کھڑے ہوگئے پھر وہاں سے واپس ہوئے اور لوگ بھی واپس ہوئے۔ رسول اللہ (صلی اللہ علیہ وآلہ وسلم) اپنے اونٹ کی لگام سے اس کا سر کھینچ رہے اور اس کو روکے جارہے تھے اور فرما رہے تھے : اے لوگو ! سکینہ اپناؤ ۔ حتیٰ کہ جب وادی محسر پہنچ گئے تو تب (کچھ) رفتار تیز فرمائی۔ ابن جریر