12693 ابوالاسد سلمی عن ابیہ عن جدہ کی سند سے روایت ہیں، ان کے دادا کہتے ہیں : میں رسول اللہ (صلی اللہ علیہ وآلہ وسلم) کے ساتھ ساتواں فرد تھا (یعنی ہم کل سات افراد ایک موقع پر تھے) رسول اللہ (صلی اللہ علیہ وآلہ وسلم) نے ہم کو حکم دیا تو ہم میں سے ہر ایک نے ایک ایک درہم جمع کیا اور سات دراہم میں ہم نے ایک قربانی کا جانور خرید لیا۔ ہم نے عرض کیا : یارسول اللہ ! یہ جانور ہم کو مہنگا پڑا ہے، رسول اللہ (صلی اللہ علیہ وآلہ وسلم) نے ارشاد فرمایا :
اللہ کے ہاں افضل ترین قربانی کے جانور زیادہ مہنگے اور زیادہ قیمتی ہیں۔
پھر نبی اکرم (صلی اللہ علیہ وآلہ وسلم) نے سب کو حکم فرمایا تو ایک آدمی نے جانور کا ایک ہاتھ پکڑ لیا ایک آدمی نے دوسرا ہاتھ پکڑ لیا، ایک آدمی نے ایک ٹانگ پکڑ لی اور ایک آدمی نے ایک ٹانگ پکڑلی، ایک آدمی نے ایک سینگ پکڑ لیا اور ایک آدمی نے دوسرا سینگ پکڑ لیا اور ساتویں نے اس کو ذبح کیا جبکہ ہم ساتوں نے مل کر (بیک آواز) اس پر تکبیر کہی۔
بقیہ کہتے ہیں : میں نے حماد بن زید کو پوچھا ساتواں (ذبح کرنے والا) کون تھا ؟ انھوں نے فرمایا : میں نہیں جانتا تو میں نے کہا : وہ رسول اللہ (صلی اللہ علیہ وآلہ وسلم) تھے۔ ابن عساکر
کلام : روایت محل کلام ہے : الضعیفۃ 1678 ۔