12712 حضرت علی (رض) سے مروی ہے کہ ایک آدمی نے ان سے ہدی کے بارے میں سوال کیا کہ وہ کس جانور سے ہونی چاہیے ؟ گویا آدمی کو ہدی میں شک تھا۔ حضرت علی (رض) نے پوچھا : کیا تو قرآن پڑھ سکتا ہے ؟ عرض کیا : جی ہاں۔ حضرت علی (رض) نے فرمایا : میں نے اللہ پاک کا فرمان سنا ہے :
یا ایھا الذین امنوا اوفوا بالعقود احلت لکم بھیمۃ الانعام الا مایتلی علیکم۔
اے ایمان والو ! اپنے اقراروں کو پورا کرو تمہارے لیے چار پائے جانور (جو چیرنے والے ہیں) حلال کردیئے گئے ہیں بجزان کے جو تمہیں پڑھ کر سنائے جاتے ہیں۔
آدمی نے عرض کیا : جی ہاں (ایسے ہی فرمان الٰہی ہے) اور چوپائے جانور حلال ہیں پھر حضرت علی (رض) نے فرمایا : اسی طرح فرمان الٰہی ہے :
لیذکروا اسم اللہ علی مارزقھم من بھیمۃ الانعام، ومن الانعام حمولۃ وفرشافکلوا ممن بھیمۃ الانعام
پس ذکر کریں وہ اللہ کا نام ان پر جو اللہ نے ان کو چوپائے جانور دیئے ہیں اور مویشیوں میں جو باربرداری والے ہیں اور جو کھانے کے کام آتے ہیں۔ پس کھاؤ چوپائے جانوروں میں سے۔
آدمی نے عرض کیا : جی ہاں۔ ایسا ہی ہے۔ پھر فرمایا : اسی طرح فرمان الٰہی ہے۔
من الضان اثنین ومن العمزاثنین ومن الابل اثنین ومن البقر اثنین۔
بھیڑوں میں جوڑا اور بکریوں سے جوڑا اور اونٹوں سے جوڑا اور گائے سے جوڑا۔
عرض کیا : جی ہاں (اللہ کا فرمان ایسے ہی ہے) پھر حضرت علی (رض) نے ارشاد فرمایا : (اسی طرح) میں نے اللہ کا فرمان سنا ہے :
یا ایھا الذین امنو ا لا تقتلوا الصید وانتم حرم سے بالغ الکعبۃ ۔ تک
اپنے مومنو ! جب تم احرام کی حالت میں ہو تو شکار نہ مارنا۔ اور جو تم میں سے جان بوجھ کر اسے مارے تو (یا تو اس کا) بدلہ (دے اور یہ قربانی) کعبہ پہنچائی جائے۔
یہاں ہدی کا ترجمہ قربانی سے کیا گیا ہے، یہ سب آیات سن کر سائل کو واضح ہوگیا کہ ھدی کی قربانی اللہ کا حکم ہے تب اس نے کہا : مجھ سے ایک ہرن قتل ہوگیا ہے اب مجھ پر کیا لازم ہے ؟ حضرت علی (رض) نے فرمایا : ایک بکری جو کعبہ لائی جائے (اور پھر اسے ذبح کیا جائے) جیسا کہ ابھی تو نے سنا۔
ابن ابی حاتم، السنن للبیہقی