12742 جابر بن ازرق الغاضری سے مروی ہے فرماتے ہیں میں اپنی سواری اور سامان کے ساتھ رسول اللہ (صلی اللہ علیہ وآلہ وسلم) کی خدمت میں حاضر ہوا اور آپ کی سواری کے ایک طرف ہوگیا اور ہم چلتے رہے حتیٰ کہ ہم (منزل) پہنچ گئے۔ آپ (صلی اللہ علیہ وآلہ وسلم) چمڑے کے ایک خیمے میں اتر کر تشریف لے گئے۔ پھر اس کے دروازے پر تیس سے زائد افراد کھڑے ہوگئے جن کے ہاتھ میں کوڑے تھے ۔ میں قریب ہوا تو ایک آدمی مجھے ہٹانے لگا۔ میں نے اس کو کہا اگر تو مجھے دھکے دے گا تو میں تجھے دھکے دوں گا اور اگر تو مجھ سے لڑے گا تو میں تجھ سے لڑوں گا۔ اس نے کہا : تو بڑا شریر آدمی ہے۔ میں نے کہا : اللہ کی قسم ! تو مجھ سے زیادہ شریر ہے۔ اس نے پوچھا : وہ کیسے ؟ میں نے کہا : میں یمن کے دور دراز علاقے سے آیا ہوں تاکہ نبی اکرم (صلی اللہ علیہ وآلہ وسلم) سے کچھ سن کر واپس جاکر اپنے پیچھے والے لوگوں کو سناؤں۔ لیکن اب تو مجھے روک رہا ہے۔ آدمی نے کہا : ہاں تو سچ کہتا ہے ، اللہ کی قسم میں ہی تجھ سے زیادہ شریر ہوں۔ پھر نبی اکرم (صلی اللہ علیہ وآلہ وسلم) سوار ہوگئے، لوگ عقبہ منیٰ سے آپ کے گرد جمع ہونا شروع ہوگئے اور خوب زیادہ ہوگئے اور آپ سے سوال جواب کرنے لگے۔ کثرت اور اژدھام کی وجہ سے کوئی آپ کے قریب نہیں پہنچ پارہا تھا۔ پھر ایک آدمی حاضر ہوا جس نے بال چھوٹے کرا رکھے تھے ، بجائے حلق کرانے کے۔ اس نے عرض کیا : یارسول اللہ میرے لیے دعائے رحمت کر دیجئے۔ حضور (صلی اللہ علیہ وآلہ وسلم) نے فرمایا : اے اللہ ! محلقین پر رحمت فرما۔ آدمی نے پھر عرض کیا : اے اللہ کے رسول ! مجھ پر دعائے رحمت فرمادیں۔ آپ نے پھر فرمایا : اے اللہ محلقین پر رحمت فرما۔ تین مرتبہ ایسا ہی فرمایا۔ پھر آدمی چلا گیا اور اپنا سر منڈا کر آگیا۔ اس دن میں سر منڈے کے سوا کوئی شخص نہیں دیکھ رہا تھا۔ ابونعیم