12773 بکر بن عبداللہ مزنی سے مروی ہے فرمایا : دواعرابی محرم تھے، ایک نے ہرن کو بھگایا جبکہ دوسرے نے اس کو قتل کیا۔ پھر دونوں حضرت عمر (رض) کی خدمت میں آئے، ان کے پاس عبدالرحمن بن عوف بھی تھے، حضرت عمر (رض) نے عبدالرحمن (رض) سے پوچھا : تمہارا کیا خیال ہے ؟ انھوں نے عرض کیا : ایک بکری۔ حضرت عمر (رض) نے فرمایا : میرا بھی یہی خیال ہے۔ پھر (دونوں اعرابیوں کو مخاطب ہو کر) فرمایا : تم دونوں جاؤ اور ایک بکری کی ہدی (پیش ) کرو۔ چنانچہ دونوں چلے گئے۔ ان میں سے ایک نے کہا : امیر المومنین کو معلوم نہیں کہ کیا کہیں حتیٰ کہ اپنے ساتھی سے ان کو پوچھنا پڑا۔ حضرت عمر (رض) نے اس کی بات سن لی اور دونوں کو واپس بلایا اور مذکورہ بات کرنے والے کو درہ مار کر ارشاد فرمایا : ایک تو تو شکار کو قتل کرتا ہے حالانکہ تو محرم ہے پھر فتویٰ (مسئلہ) بتانے پر اس کی تحقیر کرتا ہے، اللہ تعالیٰ کا فرمان ہے : بحکم بہ ذواعدل منکم۔ (اس کا فیصلہ تم میں سے دو معتبر آدمی کریں گے) اللہ پاک اکیلے عمر پر راضی نہیں ہوئے، اس لیے میں نے اپنے اس ساتھی سے مدد مانگی تھی۔ عبدبن حمید، ابن جریر