12793 (مسند علی (رض)) عبداللہ بن الحارث بن نوفل سے مروی ہے کہ حضرت عثمان (رض) ۔ اپنے ساتھیوں کے ہمراہ مکہ تشریف لائے تو گوشت کا سالن آپ کی خدمت میں لے کر حاضر ہوا اور یہ گوشت چکور پرندے کا تھا جس کو اہل پانی نے شکار کیا تھا پھر ہم نے اس کو نمک اور پانی میں پکالیا تھا۔ پھر اس کو عثمان (رض) اور ان کے ہمراہیوں کے پاس لے کر حاضر ہوئے تھے۔ اولاً حضرت عثمان (رض) کھانے سے رکے اور ارشاد فرمایا : یہ ایسا شکار ہے جس کا شکار ہم نے نہیں کیا اور نہ اس کو شکار کرنے کا ہم نے حکم دیا۔ اس کو قوم حل (غیر) حالت احرام والی قوم نے شکار کیا ہے اور انھوں نے اس کو ہمیں کھانے کے لیے پیش کیا ہے۔ لہٰذا اس میں کوئی حرج نہیں ہے۔ پھر حضرت عثمان (رض) نے وہ کھانا حضرت علی (رض) کی خدمت میں بھیج دیا اور لے جانے والے نے حضرت عثمان (رض) کی بات بھی حضرت علی (رض) کے گوش گزار کی۔ جس کو سن کر حضرت علی (رض) غضب آلود ہوگئے اور فرمایا : میں ہر اس آدمی کو اللہ کا واسطہ دیتا ہوں جو رسول اللہ (صلی اللہ علیہ وآلہ وسلم) کی خدمت میں اس وقت حاضر تھا جب حضور (صلی اللہ علیہ وآلہ وسلم) کی خدمت میں نیل گائے کی ران پیش کی گئی تو رسول اللہ (صلی اللہ علیہ وآلہ وسلم) نے ارشاد فرمایا : ہم حالت احرام والی قوم ہیں تم یہ گوشت ابل حل کو کھلا دو ۔ حضرت علی (رض) کی یہ بات سن کر بارہ آدمیوں نے اس کی گواہی دی ۔ پھر حضرت علی (رض) نے ارشاد فرمایا : میں ہر اس شخص کو اللہ کا واسطہ دیتا ہوں جو اس وقت رسول اللہ (صلی اللہ علیہ وآلہ وسلم) کی خدمت میں حاضر تھا جب آپ (صلی اللہ علیہ وآلہ وسلم) کی خدمت میں شتر مرغ کا انڈہ پیش کیا گیا تو حضور (صلی اللہ علیہ وآلہ وسلم) نے فرمایا : ہم محرم قوم ہیں یہ اہل حل کو کھلا دو ۔ حضرت علی (رض) کی بات سن کر پہلے والوں کے علاوہ بارہ اور آدمیوں نے گواہی دی کہ ہاں ایسا سچ ہے۔ یہ سن کر حضرت عثمان (رض) کھانے سے اٹھے اور اپنی سواری پر جا بیٹھے اور اس کھانے کو اہل ماء ہی نے کھایا جو اہل حل تھے۔
حلیۃ الاولیاء ، ابن داؤد، ابن جریر، الطحاوی، مسند ابی یعلی، السنن للبیہقی