12805 محمد بن زبیر سے مروی ہے فرمایا : میں دمشق کی مسجد میں داخل ہوا وہاں ایک بوڑھے بیٹھے تھے بڑھاپے کی وجہ سے ان کی دونوں ہنسلیاں آپس میں مل گئی تھیں۔ میں نے ان سے پوچھا : اے شیخ ! آپ نے کس کو پایا ہے ؟ اس نے کہا : میں نے نبی اکرم (صلی اللہ علیہ وآلہ وسلم) کو پایا ہے (یعنی ان کے زمانے کا ہوں) میں نے پوچھا : آپ نے کسی غزوے میں (حضور کے ساتھ) شرکت کی ہے ؟ انھوں نے فرمایا : غزوہ یرموک میں شرکت کی ہے۔ میں نے عرض کیا کوئی بات بیان کیجئے جو آپ نے ان سے سنی ہو ؟ تو وہ بولے میں قبیلہ عک اور اشعریین کے لوگوں کے ساتھ حج پر نکلا۔ ہم سے کچھ انڈے شتر مرغ کے ٹوٹ گئے۔ (یہ زمانہ حضرت عمر (رض) کے دور خلافت کا تھا) تو ہم نے یہ مسئلہ حضرت امیر المومنین عمر بن خطاب (رض) کو ذکر کیا۔ حضرت عمر (رض) منہ موڑ کر چل پڑے اور فرمایا : میرے پیچھے چلے آؤ۔ حتیٰ کہ وہ رسول اللہ (صلی اللہ علیہ وآلہ وسلم) کے حجروں کی طرف تشریف لے گئے اور ایک حجرے پر ہاتھ مارا تو ایک عورت نے جواب دیا حضرت عمر (رض) نے پوچھا : کیا یہاں ابوالحسن (علی (رض)) ہیں ؟ عورت بولی : نہیں وہ فلاں جھنڈ میں ہیں۔ پھر حضرت عمر (رض) وہاں موڑ کر چل دیئے اور ہمیں فرمایا : میرے پیچھے چلتے آؤ۔ حتیٰ کہ آپ (رض) حضرت علی (رض) کے پاس پہنچ گئے۔ حضرت علی (رض) بولے : مرحبا (خوش آمدید ہو) امیر المومنین کو۔ حضرت عمر (رض) نے فرمایا یہ کچھ جوان آئے ہیں عک اور اشعریین کے۔ ان سے شتر مرغ کے کچھ انڈے ٹوٹ گئے ہیں حالت احرام میں ؟ حضرت علی (رض) نے فرمایا آپ نے (خود کیوں زحمت فرمائی) مجھے پیغام کیوں نہ بھجوا کر بلوالیا ؟ حضرت عمر (رض) بولے : میں تمہارے پاس حاضر ہونے کا زیادہ حقدار تھا۔ حضرت علی (رض) نے مسئلہ کا جواب ارشاد فرمایا کہ یہ نر اونٹ کو (انڈوں کی بقدر) اپنی باکرہ اونٹنیوں پر چھوڑ دیں پھر جو بچے پیدا ہوں وہ اللہ کی راہ میں ہدی کردیں۔ حضرت عمر (رض) بولے : بعض مرتبہ اونٹنی کو کوئی صدمہ پہنچ جاتا ہے جس کی وجہ سے بچہ ضائع ہوجاتا ہے، پھر ؟ حضرت علی (رض) نے فرمایا : اور انڈے بھی تو خراب نکل آتے ہیں۔ چنانچہ حضرت عمر (رض) وہاں سے یہ دعا کرتے ہوئے چلے آئے اے اللہ ! مجھ پر کوئی ایسا سخت مسئلہ پیش نہ فرما الا یہ کہ ابوالحسن میرے پاس ہوں (پھر مجھے کوئی پروا نہیں ہے) ۔ ابن عساکر