12833 عطاء یسار سے مروی ہے کہ کعب احبار (رح) شام سے ایک قافلے کے ساتھ تشریف لائے حتیٰ کہ جب وہ راستے میں پہنچے تو انھوں نے شکار کا گوشت پایا۔ حضرت کعب (رح) نے ان کو کھانے کا فتویٰ دیدیا۔ پھر جب یہ لوگ حضرت عمر بن خطاب (رض) کے پاس پہنچے تو ان کی خدمت میں یہ واقعہ عرض کیا۔ حضرت عمر (رض) نے پوچھا : تم لوگوں کو یہ فتویٰ کس نے دیا تھا ؟ لوگوں نے کہا : کعب نے۔ حضرت عمر (رض) نے ارشاد فرمایا : میں نے تم پر انہی کو امیر بنادیا جب تک کہ تم واپس پہنچو۔ پھر جب یہ لوگ (کسی اور) راستے میں تھے تو ان کے پاس ٹڈیوں کا غول گزرا حضرت کعب (رح) نے اپنے ساتھیوں کو فتویٰ دیا کہ وہ ان کو پکڑ سکتے ہیں اور کھاسکتے ہیں۔ پھر جب یہ لوگ حضرت عمر (رض) کے پاس پہنچے تو انھوں نے یہ واقعہ بھی ذکر کیا حضرت عمر (رض) نے حضرت کعب (رح) سے پوچھا : یہ فتوی دینے پر تمہیں کس چیز نے مجبور کیا ؟ کعب بولے : یہ سمندری شکار ہے، حضرت عمر (رض) نے پوچھا : تمہیں کیا معلوم ؟ کعب (رح) بولے : امیر المومنین ! قسم ہے اس ذات کی جس کے ہاتھ میں میری جان ہے یہ ٹڈیاں ایک مچھلی کی چھینک سے نکلتی ہیں اور مچھلی سال میں دو مرتبہ چھینکتی ہے۔ موطا امام مالک