12903 حضرت علی (رض) سے مروی ہے ، فرمایا رسول اللہ (صلی اللہ علیہ وآلہ وسلم) عرفہ میں کھڑے ہوئے اور ارشاد فرمایا :
یہ موقف (کھڑے ہونے کی جگہ) ہے اور عرفہ (میدان عرفات) سارا ہی موقف ہے۔ پھر سورج غروب ہونے کے بعد وہاں سے آپ واپس ہوئے اور اسامہ (رض) کو اپنا ردیف بنالیا اور اپنے اونٹ پر چوڑے چوڑے قدم بھرنے لگے۔ جبکہ لوگ دائیں بائیں اپنی اپنی سواریوں کو تیز تیز دوڑا رہے تھے، آپ ان کی طرف متوجہ ہو کر ارشاد فرماتے تھے : اے لوگو ! سکینہ (صبر کے ساتھ چلو) پھر حضور نبی اکرم (صلی اللہ علیہ وآلہ وسلم) مزدلفہ تشریف لائے اور لوگوں کو مغرب اور عشاء کی نمازیں پڑھائیں پھر رات بسر فرمائی حتیٰ کہ صبح کی اور پھر مقام قزح پر تشریف لائے اور فرمایا : یہ موقف ہے اور مزدلفہ سارا ہی موقف ہے۔ پھر وہاں سے چل کروادی محسر پہنچے اور وہاں کھڑے ہوگئے پھر اپنی سواری کو تیز دوڑایا حتیٰ کہ اس وادی کو پار کرلیا۔ پھر سواری کو روک لیا اور وہاں سے فضل کو اپنا ردیف بنایا اور چل پڑے حتیٰ کہ جمرہ پر پہنچے اور اس کی رمی فرمائی پھر قربان گاہ پہنچے اور ارشاد فرمایا : یہ قربان گاہ ہے اور منیٰ سارا ہی قربان گاہ ہے (وہاں) قبلہ حثعم کی ایک باندی نے فتویٰ پوچھا، عرض کیا : میرے والد بوڑھے آدمی ہیں اور (چلنے پھرنے سے معذور ہو کر) بیٹھے رہ گئے ہیں اور ان پر اللہ کا فرض یعنی حج لازم ہوچکا ہے، کیا ان کی طرف سے میرا حج کرنا کافی ہوسکتا ہے ؟ ارشاد فرمایا : جی ہاں۔ اپنے والد کی طرف سے (حج) ادا کرو اور اس وقت آپ (صلی اللہ علیہ وآلہ وسلم) نے فضل (رض) کی گردن موڑ دی تھی۔ حضرت عباس (رض) نے آپ سے پوچھا : یارسول اللہ ! آپ نے اپنے چچازاد کی گردن کیوں پھیر دی ؟ حضور (صلی اللہ علیہ وآلہ وسلم) نے ارشاد فرمایا : میں نے نوجوان مرد اور نوجوان عورت کو دیکھا تو شیطان پر ان کے متعلق بھروسہ نہ کیا۔ پھر آپ (صلی اللہ علیہ وآلہ وسلم) کے پاس دوسرا شخص حاضر ہوا اور عرض کیا : یارسول اللہ ! میں نے حلق کرائے بغیر افاضہ کرلیا (منیٰ سے واپسی کرلی) ہے ؟ ارشاد فرمایا : حلق یا قصر کرالو اور کوئی حرج نہیں ۔ پھر نبی (صلی اللہ علیہ وآلہ وسلم) بیت اللہ تشریف لائے اور اس کا طواف کیا پھر زمزم تشریف لائے اور عرض کیا : اے بنی عبدالمطلب تم پانی پلاؤ، اگر لوگوں کے رش کردینے کا خوف (دامن گیر) نہ ہوتا تو میں خود (بھی ڈول بھر کر) نکالتا۔ مسند احمد ، مسند ابی یعلی، ابن ابی شیبہ
اس کا کچھ حصہ ابن وھب نے اپنی مسند میں نقل کیا ہے۔
ابن داؤد الترمذی، حسن صحیح، ابن خزیمہ، ابن الجارود، ابن جریر، السنن للبیہقی