12908 عتبہ بن عبدالملک السہمی سے مروی ہے فرماتے ہیں : مجھے زرارۃ بن کریم بن الحارث بن عمرو السہمی نے بیان کیا کہ ان کو حارث بن عمرو نے بیان کیا کہ میں رسول اللہ (صلی اللہ علیہ وآلہ وسلم) کی خدمت میں منیٰ میں یا عرفات میں حاضر ہوا۔ آپ کے پاس اعراب (عربی بدو) آجا رہے تھے۔ جب وہ آپ کے چہرے مبارک کو دیکھتے تو کہتے یہی چہرہ وہ مبارک چہرہ ۔ میں نے عرض کیا : یارسول اللہ ! میرے لیے استغفار کر دیجئے ! آپ (صلی اللہ علیہ وآلہ وسلم) نے فرمایا : اے اللہ ! ہم سب کی مغفرت فرما۔ میں دوسری طرف سے گھوم کر گیا اور عرض کیا : یارسول اللہ ! میرے لیے استغفار کر دیجئے۔ آپ (صلی اللہ علیہ وآلہ وسلم) نے ارشاد فرمایا : اے اللہ ہم سب کے لیے مغفرت فرما دیجئے۔ میں پھر گھوم کر دوسری طرف گیا اور عرض کیا : یارسول اللہ ! (خاص) میرے لیے استغفار کر دیجئے ! آپ نے پھر وہی دعا فرمائی : اے اللہ ! ہماری مغفرت فرمادے۔ پھر آپ (صلی اللہ علیہ وآلہ وسلم) تھوکنے لگے تو اس کو اپنے ہاتھ پر تھوکا اور اپنے جوتے پر مسل لیا اس احتیاط سے کہ کہیں کسی کے اوپر نہ گرجائے پھر ارشاد فرمایا : اے لوگو ! یہ کون سا دن ہے اور کونسا ماہ ہے ؟ بیشک تمہارے خون ۔۔۔الخ ۔ پھر پچھلی حدیث کے مثل ذکر فرمایا۔ ابونعیم