13439 ابو جعفر محمد بن علی (رح) سے مروی ہے کہ صفوان بن امیہ کی وجہ سے تین سنتوں (اسلامی احکام) کا علم ہوا۔
ایک مرتبہ رسول اللہ (صلی اللہ علیہ وآلہ وسلم) نے جب آپ جنگ حنین کے لیے کوچ فرما رہے تھے صفوان بن امیہ سے عاریت پر فولادی زرہیں طلب کیں۔ صفوان نے کہا : اے محمد ! کیا یہ غصب ہے ؟ آپ (صلی اللہ علیہ وآلہ وسلم) نے فرمایا : نہیں بلکہ عاریت ہے۔ اور اس کی ضمانت دی جاتی ہے۔
ابوجعفر (رح) فرماتے ہیں : چنانچہ عاریت کی ضمانت دی جانے لگی جب تک کہ وہ مالک کو ادا نہ کردی جائے۔
اسی طرح ایک مرتبہ صفوان فتح مکہ کے بعد مدینے آئے۔ یہ فتح مکہ کے موقع پر مسلمان ہوئے، یہ ان لوگوں میں سے تھے جن پر آپ (صلی اللہ علیہ وآلہ وسلم) نے احسان کرکے ان کی جان بخشی تھی۔ آپ (صلی اللہ علیہ وآلہ وسلم) نے پوچھا : اے ابوامیہ ! تجھے کیا چیز مدینے لائی ؟ انھوں نے عرض کیا : اے اللہ کے نبی ! لوگوں کا خیال ہے کہ جو ہجرت نہ کرے اس کا (اسلام میں) کوئی حصہ نہیں ہے۔ آپ (صلی اللہ علیہ وآلہ وسلم) نے فرمایا : اے امیہ ! تم بخوشی ضرور واپس جاؤ اور مکہ کی وادی بطحاء میں کھل کر رہو۔
ابوجعفر (رح) فرماتے ہیں : تب لوگوں کو علم ہوا کہ فتح مکہ کے بعد ہجرت ختم ہوگئی ہے۔ اسی طرح ایک مرتبہ صفوان نے مسجد نبوی (صلی اللہ علیہ وآلہ وسلم) میں راست بسر کی۔ ان کی قمیص جوان کے سرہانے رکھی تھی، کسی نے چرالی۔ صفوان چور کو پکڑنے میں کامیاب ہوگئے۔ چنانچہ وہ ان کو لے کر نبی اکرم (صلی اللہ علیہ وآلہ وسلم) کی خدمت میں حاضر ہوئے اور عرض کیا : اس نے میری قمیص چوری کی ہے۔
آپ (صلی اللہ علیہ وآلہ وسلم) نے اصحاب کو حکم دیا اس کو لے جاؤ اور اس کا ہاتھ کاٹ دو ۔ تب صفوان نے عرض کیا : یارسول اللہ یہ اس کی ہوئی (آپ اس کا ہاتھ نہ کاٹیں) ۔ آپ (صلی اللہ علیہ وآلہ وسلم) نے فرمایا : میرے پاس لانے سے قبل یہ کام کیوں نہ کرلیا۔
ابوجعفر (رح) فرماتے ہیں : تب لوگوں کو علم ہوا کہ حد کا مسئلہ جب تک حاکم کے پاس نہ پہنچے اس کو معاف کیا جاسکتا ہے۔ ابن عساکر