13441 طاؤس (رح) سے مروی ہے کہ صفوان بن امیہ کو کسی نے کہا : جس نے ہجرت نہیں کی وہ ہلاک ہوگیا۔ تب صفوان نے قسم اٹھائی کہ وہ اس وقت تک سر نہ دھوئیں گے جب تک نبی اکرم (صلی اللہ علیہ وآلہ وسلم) کے پاس نہ چلے جائیں (یعنی ہجرت مدینہ نہ کرلیں) پھر صفوان چلے اور مسجد نبوی پر آپ (صلی اللہ علیہ وآلہ وسلم) کا سامنا کیا اور عرض کیا : یارسول اللہ ! مجھے کہا گیا کہ جس نے ہجرت نہیں کی وہ ہلاک ہوگیا۔ چنانچہ میں نے قسم اٹھالی کہ جب تک آپ کے پاس نہ پہنچ جاؤں سر نہ دھوؤں گا۔ تب نبی اکرم (صلی اللہ علیہ وآلہ وسلم) نے ارشاد فرمایا : صفوان نے اسلام کو سنا اور اس کے دین ہونے پر راضی ہوگئے۔ اب فتح مکہ کے بعد ہجرت منقطع ہوچکی ہے۔ لیکن جہاد اور نیت ہے۔ پس جب بھی تم کو اللہ کی راہ میں نکلنے کو کہا جائے نکل پڑو۔
طاؤس (رح) فرماتے ہیں : پھر صفوان ایک قمیص کے چور کو پکڑ کر لائے۔ آپ (صلی اللہ علیہ وآلہ وسلم) نے اس کا ہاتھ کاٹنے کا حکم جاری کیا۔ صفوان بولے : میرا یہ ارادہ نہ تھا یارسول اللہ یہ چادر اس پر صدقہ ہے۔ آپ (صلی اللہ علیہ وآلہ وسلم) نے ارشاد فرمایا : تم نے یہ کام پہلے کیوں نہ کیا (اب حد جاری ضرور ہوگی) ۔
المصنف لعبد الرزاق