13503 عن الزھری عن عبیداللہ کی سند سے مروی ہے حضرت ابوہریرہ (رض) اور حضرت زید بن خالد بن شبل فرماتے ہیں کہ ہم لوگ حضور نبی اکرم (صلی اللہ علیہ وآلہ وسلم) کی جناب میں حاضر خدمت تھے۔ ایک اعرابی اٹھا اور (آپ (صلی اللہ علیہ وآلہ وسلم) سے مخاطب ہو کر) بولا : میں آپ کو اللہ کا واسطہ دیتا ہوں کہ آپ ہمارے درمیان کتاب اللہ کے ساتھ فیصلہ فرمائیے۔ اس کا فریق مخالف جو اس سے سمجھ دار تھا بولا : جی ہاں ! ہمارے درمیان کتاب اللہ کے ساتھ فیصلہ فرمائیے اور مجھے بولنے کی اجازت دیجئے۔ آپ (صلی اللہ علیہ وآلہ وسلم) نے ارشاد فرمایا :
بولو ! چنانچہ وہ بولا : کہ میرا بیٹا اس شخص کے ہاں مزدوری کررہا تھا اس نے اس کی عورت کے ساتھ زنا کا ارتکاب کرلیا ہے۔ لوگوں نے مجھے کہا کہ میرے بیٹے کو رجم کی سزا ہوگی۔ لیکن میں نے اس کی طرف سے سو بکریاں اور ایک غلام بطور مزدوری اس کو دے دیا ہے۔ پھر میں نے کچھ اہل علم سے سوال کیا تو انھوں نے مجھے کچھ مختلف بات بیان کی کہ میرے بیٹے کو سو کوڑے لگیں گے اور ایک سال کی جلاوطنی کی سزا ہوگی اور اس کی بیوی کو رجم کی سزا ہوگی۔ آپ (صلی اللہ علیہ وآلہ وسلم) نے ارشاد فرمایا :
قسم ہے اس ذات کی جس کے ہاتھ میں میری جان ہے ! میں تم دونوں کے درمیان کتاب اللہ کے ساتھ فیصلہ کرتا ہوں۔ سو بکریاں اور خادم تجھ کو واپس ملے گا۔ اور تیرے بیٹے پر سو کوڑے اور ایک سال کی جلاوطنی کی سزا ہوگی۔ جبکہ اس شخص کی بیوی کو رجم کرنا ہوگا۔
پھر آپ (صلی اللہ علیہ وآلہ وسلم) نے اپنے خادم کو حکم فرمایا : اے انس ! صبح کو اس شخص کی بیوی کے پاس جا۔ اگر وہ اپنے جرم کا اعتراف کرتی ہے تو اس کو رجم کرادینا۔ چنانچہ صبح کو اس عورت کے پاس گئے تو اس نے اپنے جرم کا اعتراف کرلیا اور اس کو رجم کردیا گیا۔ الجامع لعبد الرزاق المصنف لا بن ابی شیبہ