13512 حضرت عمر (رض) سے مروی ہے کہ اللہ عزوجل نے محمد (صلی اللہ علیہ وآلہ وسلم) کو حق کے ساتھ مبعوث فرمایا اور ان پر کتاب نازل کی۔ اسی کتاب میں آیت رجم بھی تھی۔ ہم نے اس کو پڑھا اور محفوظ کرلیا۔ رسول اللہ (صلی اللہ علیہ وآلہ وسلم) نے بھی رجم کیا اور آپ کے بعد ہم نے بھی رجم کیا۔ مجھے خود خطرہ ہے کہ لوگوں پر طویل زمانہ گزرے گا تو کوئی کہے گا : ہم کتاب اللہ میں آیت رجم نہیں پاتے۔ پس وہ ایسے فریضے کے انکار کے ساتھ گمراہ ہوجائیں گے جو اللہ نے نازل کیا ہے۔ پس رجم کتاب اللہ میں ہے۔ زانی پر لازم ہے جبکہ وہ شادی شدہ ہو مرد ہو یا عورت۔ بشرطیکہ گواہ قائم ہوں یا حمل ظاہر ہو (عورت کے لئے) یا زانی خود اعتراف کرلے۔ خبردار ! ہم یہ آیت بھی پڑھا کرتے تھے :
لا ترغبوا عن آباء کم فانہ کفر بکم ان ترغبوا عن آباء کم،
اپنے آباء سے اپنی نسبت کا انکار نہ کرو یہ تمہارا انکار ہے کہ تم اپنے آباء سے اعراض کرو۔
الجامع لعبد الرزاق، المصنف لا بن ابی شیبہ، مسنداحمد، العدنی، الدارمی، البخاری، مسلم، ابوداؤد، الترمذی، النسائی ، ابن ماجہ ، ابن الجارود، ابن جریر، ابو عوانۃ، ابن حبان، السنن للبیہقی
امام مالک نے اس کا کچھ حصہ روایت کیا ہے۔