13523 حضرت سعید بن المسیب (رح) سے مروی ہے کہ حضرت عمر (رض) (اپنے آخری حج کے موقع پر) جب منیٰ سے واپس ہونے لگے تو وادی ابطح میں اپنی سواری بٹھادی۔ پھر (اتر کر) بطحاء سے پتھر کا ایک ٹکڑا لیا اور اس پر کپڑا ڈال کر چت لیٹ گئے اور اپنے ہاتھ آسمان کی طرف بلند کرکے گڑگڑائے :
اے اللہ ! میں سن رسیدہ ہوگیا ہوں، میرے قوی کمزوری کا شکار ہوگئے ہیں، میری رعیت منتشر ہوچکی ہے پس مجھے اس حال میں اٹھالے کہ مجھ سے کوئی کوتاہی اور نقصان نہ ہو۔
پھر آپ (رض) مدینہ پہنچ گئے تو لوگوں کو خطبہ دیا اور ارشاد فرمایا :
اے لوگو ! میں نے تمہارے لیے فرائض واضح کردیئے، سنتوں کو روشن کردیا اور تم کو واضح راستے پر چھوڑ دیا۔ پھر آپ (رض) نے (تنبہاً ) دائیں ہاتھ سے بائیں ہاتھ پر تالی بجائی اور فرمایا : خبردار ! لوگوں کے ساتھ دائیں بائیں نکل کر گمراہ نہ ہوجانا۔ نیز آیت رجم کے متعلق ہلاکت میں نہ پڑنا۔ کہیں کوئی کہے : ہم کتاب اللہ مں دو حدیں نہیں پاتے۔ بیشک میں نے رسول اللہ (صلی اللہ علیہ وآلہ وسلم) کو دیکھا ہے کہ آپ نے رجم فرمایا اور ہم نے بھی آپ کے بعد رجم کیا ۔ اللہ کی قسم ! اگر لوگ یہ نہ کہتے کہ عمر نے کتاب اللہ میں نئی بات لکھ دی تو میں ضرور قرآن پاک میں اس کو لکھ دیتا جس طرح ہم نے اس کو پڑھا تھا :
الشیخ والشیخۃ اذا زنیا فارجموھما البتۃ۔
حضرت سعید بن المسیب (تابعی) فرماتے ہیں : چنانچہ یہ ماہ ذوالحجہ ختم نہیں ہوا تھا کہ ان کو نیزہ مار (کر زخمی اور قریب المرگ کر) دیا گیا۔ موطا امام مالک، ابن سعد ، مسدد، مستدرک الحاکم