13543 عن معمر عن الزھری عن ابی سلمۃ بن عبدالرحمن کی سند سے مروی ہے کہ قبیلہ اسلم کا ایک شخص آیا اور زنا کا اعتراف کیا۔ آپ (صلی اللہ علیہ وآلہ وسلم) نے اس سے اعراض کرلیا۔ اس نے دوبارہ اعتراف کرلیا۔ آپ نے پھر اعراض کیا۔ حتیٰ کہ اس نے چار مرتبہ اپنے آپ پر شہادت دے دی۔ پھر آپ (صلی اللہ علیہ وآلہ وسلم) نے پوچھا : کیا تجھے جنون تو نہیں ہے ؟ اس نے انکار میں جواب دیا۔ آپ نے دریافت کیا : کہا تو محصن (شادی شدہ آزاد منش) ہے ؟ اس نے اثبات میں جواب دیا۔ چنانچہ آپ (صلی اللہ علیہ وآلہ وسلم) نے اس کے لیے حکم سنادیا اور اس کو میدان عیدگاہ میں رجم کردیا گیا۔ لیکن جب پتھروں نے اس کے قدم اکھاڑ دیئے تو وہ بھاگ پڑا لیکن پھر لوگوں نے اس کو جالیا اور پتھر مار مار کر اس کو رجم کردیا (ماردیا) ۔
پھر آپ (صلی اللہ علیہ وآلہ وسلم) نے اس کے متعلق خیر کے کلمات ارشاد فرمائے۔ اور خود اس پر نماز ادا نہیں فرمائی۔
معمر کہتے ہیں : مجھے ابن طاؤس نے اپنے والد سے روایت کیا کہ جب حضور نبی اکرم (صلی اللہ علیہ وآلہ وسلم) کو یہ خبر ملی کہ وہ شخص پتھروں کی مار میں بھاگ پڑا تھا تو آپ (صلی اللہ علیہ وآلہ وسلم) نے فرمایا : پھر تم نے اس کو چھوڑ کیوں نہ دیا ؟
معمر کہتے ہیں : مجھے ایوب بن حمید نے ھلال سے خبر نقل کی کہ جب نبی اکرم (صلی اللہ علیہ وآلہ وسلم) نے اسلمی شخص کو رجم کروادیا تو ارشاد فرمایا : تم لوگ مجھ سے اپنے عیوب چھپاؤ جن کو اللہ نے مجھ سے چھپالیا۔ اور جو کسی گناہ کا مرتکب ہوجائے وہ اس کو چھپائے (اور توبہ تائب ہوجائے) ۔
معمر کہتے ہیں : مجھے یحییٰ بن ابی کثیر نے عکرمہ سے خبر نقل کی کہ جب ماعز (اسلمی) زنا کا اعتراف کرلیا تو آپ (صلی اللہ علیہ وآلہ وسلم) نے اس سے اس طرح کے سوالات کیے تھے : کیا تو نے صرف بوسہ لیا ہے ؟ کیا تو نے جماع کیا ہے ؟ الجامع لعبدالرزاق