١٣٥٥۔۔ ازمسند عمر (رض) یحییٰ بن یعمر، ابن عمر (رض) سے روایت کرتے ہیں کہ مجھے عمر (رض) بن خطاب نے بیان کیا کہ وہ رسول اللہ کے پاس حاضر خدمت تھے کہ آپ کے پاس ایک شخص آیا، اس کے جسم پر دوسفید کپڑے تھے متناسب الاعضائ، اور اچھی شکل و صورت کا مالک تھا، اس نے آکر آپ سے عرض کیا یارسول اللہ ! کیا میں آپ کے قریب ہوسکتا ہوں، آپ نے فرمایا ہوجاؤ، قریب تو وہ قریب ہوتے ہوتے اتناقریب آگیا کہ اس کے گھٹنے رسول اللہ کے گھٹنوں سے آملے۔ پھر اس نووارد نے عرض کیا : کیا میں کچھ سوال کرسکتا ہوں ؟ آپ نے فرمایا کہ کرو سوال۔ عرض کیا مجھے اسلام کے بارے میں خبر دیجئے ؟ فرمایا اس بات کی شہادت دینا کہ اللہ کے سوا کوئی پرستش کے لائق نہیں اور میں اللہ کا رسول ہوں، ، نماز قائم کرنا، زکوۃ ادا کرنا، بیت اللہ کا حج کرنا، اور رمضان کے روزے رکھنا، اس نے عرض کیا تو کیا میں ان افعال کی ادائیگی کے بعد مسلمان ہوجاؤں گا ؟ فرمایا جی ہاں۔ اس شخص نے عرض کیا، آپ نے سچ فرمایا اس پر ہم کو تعجب ہوا کہ وہ شخص سائل ہونے کے باوجود جو کہ لاعلم ہوتا ہے تصدیق کررہا ہے، گویا اس کو پہلے اس کا علم تھا، پھر اس شخص نے سوال کیا یارسول اللہ مجھے ایمان کے بارے میں خبر دیجئے ؟ فرمایا یہ کہ تم اللہ اور اس کے ملائکہ اور فرشتوں اور رسولوں اور بعث بعد الموت پر ایمان لاؤ اور اس بات پر کہ جنت حق ہے جہنم حق ہے اور اچھی بری تقدیر پر ایمان لاؤ، سائل نے عرض کیا اگر میں ایسا کرلوں تو کیا میں مومن ہوجاؤں گا، فرمایا جی ہاں سائل نے پھر سوال کیا مجھے قیامت کے متعلق خبر دیجئے ؟ فرمایا اس کے متعلق مسوئل کو سائل سے زیادہ علم نہیں ہے، یہ ان اشیاء خمسہ میں ہے جن کا علم ماسوا اللہ کے کسی کو نہیں۔ بیشک قیامت کا علم اللہ ہی کو ہے۔ وہی بارش برساتا ہے ، اس پر سائل نے کہا، آپ نے سچ فرمایا۔ ابوداؤد الطیالسی۔