13557 عن ابن عینیہ عن یحییٰ بن سعید عن سعید بن المسیب کی سند سے مروی ہے کہ بنی اسلم کا ایک شخص حضرت عمر (رض) کے پاس گیا اور اپنے آپ کے متعلق بولا اس کمینے نے زنا کیا ہے۔ حضرت عمر (رض) نے مشورہ دیا کہ تم اللہ سے توبہ کرلو اور اپنے گناہ پر اللہ کا ڈالا ہوا پردہ نہ اٹھاؤ۔ بیشک اللہ اپنے بندوں کی توبہ قبول کرتا ہے، جبکہ لوگ عار اور شرم دلاتے ہیں اور کچھ نہیں کرسکتے۔ لیکن اس کا ضمیر نہ مانا اور وہ حضرت ابوبکر (رض) کے پاس آیا اور آپ (رض) نے بھی وہی بات کی جو حضرت عمر (رض) نے کہی تھی ۔ لیکن اس کا ضمیر اس کو جھنجھوڑتا رہا اور بالآخر وہ نبی اکرم (صلی اللہ علیہ وآلہ وسلم) کے پاس آگیا اور اپنی جرم کاری سنائی۔ آپ (صلی اللہ علیہ وآلہ وسلم) نے اس سے اعراض برتا (شاید وہ لوٹ جائے) اسلمی دوسری جانب سے آیا۔ آپ (صلی اللہ علیہ وآلہ وسلم) نے پھر دوسری جانب منہ کرلیا۔ وہ پھر اس جانب آیا اور اپنا جرم بیان کیا۔ آپ (صلی اللہ علیہ وآلہ وسلم) نے اس کی قوم والوں کے پاس پیغام بھیج کر ان کو بلوایا اور ان سے پوچھا : کیا یہ شخص مجنون ہے ؟ کیا اس کو کوئی دماغی بیماری ہے ؟ لوگوں نے کہا : نہیں۔ تب آپ (صلی اللہ علیہ وآلہ وسلم) نے حکم دیا اور اس کو رجم کردیا گیا۔
ابن عینیہ (رح) کہتے ہیں : مجھے عبداللہ بن دینار نے خبر دی کہ (اس کے بعد) نبی کریم (صلی اللہ علیہ وآلہ وسلم) منبر پر کھڑے ہوئے اور ارشاد فرمایا : اے لوگو ! گندگی سے بچو، جس سے اللہ نے تم کو منع کیا ہے اور جس سے کوئی ایسی حرکت سرزد ہوجائے وہ اس کو چھپائے۔
یحییٰ بن سعید عن نعیم عن عبداللہ بن ھزال کی سند سے بیان کرتے ہیں کہ حضور نبی کریم (صلی اللہ علیہ وآلہ وسلم) نے ھزال کو فرمایا : اگر تم اپنا یہ گناہ اپنے کپڑے کے ساتھ چھپاتے تو تمہارے لیے زیادہ بہتر ہوتا۔
ھزال وہ شخص تھا جو نبی اکرم (صلی اللہ علیہ وآلہ وسلم) کے پاس آکر خبر دیتا تھا ابن المسیب (رح) فرماتے ہیں : حد لگانے کی سنت یہ ہے کہ جب آدمی پر حد جاری کردی جائے تو اس کو گزشتہ گناہ سے توبہ کرنے کو کہا جائے۔