13565 صالح بن کرز سے مروی ہے فرماتے ہیں کہ میری باندی نے زنا کیا اس کو لے کر حکم بن ایوب کے پاس آیا۔ میں ابھی بیٹھا تھا کہ حضرت انس بن مالک (رض) تشریف لائے اور بیٹھ گئے۔ آپ نے پوچھا : اے صالح ! یہ باندی تیرے ساتھ کیوں ہے ؟ میں نے عرض کیا : یہ میری باندی ہے، اس نے زنا کیا ہے، میرا ارادہ ہوا کہ حاکم کے سامنے کو پیش کروں تاکہ وہ اس پر حد جاری کردے۔ حضرت انس (رض) نے فرمایا : ایسا نہ کر، بلکہ اپنی باندی کو واپس لے جا۔ اللہ سے ڈر اور اس پر پردہ ڈال لے۔ میں نے عرض کیا : میں ایسا نہیں کرسکتا۔ آپ (رض) نے فرمایا : ایسا نہ کر میری بات مان لے۔ چنانچہ وہ مجھے بار بار کہتے رہے آخر میں باندی کو واپس لے آیا۔ الجامع لعبد الرزاق