13591 قاسم بن محمد سے مروی ہے کہ ابوالسیارۃ ابوجندب کی بیوی پر فریفتہ ہوگیا۔ اور اس کو بہلانے پھسلانے لگا۔ لیکن ابوجندب کی بیوی نے انکار کردیا اور کہا : ایسانہ کر، اگر ابوجندب کو معلوم ہوگیا تو وہ تجھے قتل کردے گا۔ لیکن ابوالسیارۃ نے باز آنے سے انکار کردیا۔ بیوی نے ابوجندب کے بھائی سے بات کی۔ ابوجندب کے بھائی نے ابوالسیارۃ کو سمجھایا لیکن وہ پھر بھی باز نہ آیا۔ ابوجندب کی بیوی نے اپنے شوہر کو بتایا۔ ابوجندب نے کہا : میں لوگوں کو کہہ کرجاتا ہوں کہ میں اونٹوں کے پاس جارہا ہوں (ابوالسیارۃ کو علم ہوجائے گا) پھر تاریکی میں آکر میں گھر میں چھپ جاؤں گا پھر وہ آئے تو تم اس کو اندر میرے پاس بلالینا۔ چنانچہ ابوجندب لوگوں کو کہہ کر کہ میں اونٹوں کے پاس (شہر سے باہر باڑے پر) جارہا ہوں، چلے گئے۔ چنانچہ جب تاریکی چھا گئی تو وہ چھپ کر واپس آگئے اور کمرے کے اندر چھپ گئے۔ پھر ابوالسیارۃ آیا اور ابو جندب کی بیوی رات کی تاریکی میں آٹا پیس رہی تھی۔ چنانچہ ابوالسیارۃ نے آکر ابوجندب کی بیوی کو پھسلانا چاہا۔ ان کی بیوی بولی : افسوس ہے تجھ پر ! کیا اس کام پر میں نے کبھی بھی تجھے پھسلایا ہے ؟ ابوالسیارہ بولا : ہرگز نہیں۔ لیکن مجھے بغیر صبر نہیں ہوتا۔ بیوی بولی : اچھا اندر کمرے میں چل ! میں تیرے لیے تیار ہو کر آتی ہوں۔ چنانچہ جیسے ہی ابوالسیارۃ کمرے میں داخل ہوا۔ ابوجندب جو اندر ہی تھے انھوں نے کمرے کا دروازہ بند کرلیا پھر ابوالسیارۃ کو پکڑ کر گدی سے لے کر نیچے تک خوب مارنا شروع کردیا۔ ابوجندب کی بیوی ابوجندب کے بھائی کے پاس گئی اور بولی آدمی کو بچالو۔ ورنہ ابو جندب اس کو قتل کردے گا۔ چنانچہ ان کے بھائی نے ان کو اللہ کا واسطہ دے کر روکا تو انھوں نے چھوڑ دیا پھر ابوجندب نے ابوالسیارۃ کو اٹھا کر اونٹوں کے راستے پر باہر پھینک دیا۔ پھر جب بھی ان کے پاس سے کوئی گزرتا اور ان سے ان کی حالت کا پوچھتا تو وہ کہتا : میں اونٹ سے گرگیا تھا پھر اونٹ نے اوپر سے مجھے کچل دیا جس کی وجہ سے میں کبڑا ہوگیا ہوں۔
پھر ابو السیارۃ نے آکر حضرت عمر (رض) کو شکایت کی (حضرت عمر (رض)) نے پیغام بھیج کر ابو جندب کو بلایا۔ ابوجندب سارا واقعہ سچا سچا کہہ سنایا۔ حضرت عمر (رض) نے اہل ماء (لوگوں) کو بلایا تو انھوں نے بھی ابوجندب کی بات کی تصدیق کی۔ چنانچہ حضرت عمر (رض) نے ابوالسیارۃ کو سو کوڑے مارے اور ان کی دیت کو بھی باطل کردا۔ (یعنی ان کے لیے ابوجندب پر کوئی تاوان نہیں) ۔
الخرائطی فی اعتدال القلوب