١٣٦٦۔۔ ازمسند عمر (رض) حضرت حسن سے مروی ہے کہ ایک اعرابی حضرت عمر (رض) کی خدمت میں آیا اور کہا اے امیرالمومنین مجھے دین کی تعلیم دیجئے آپ نے فرمایا یہ کہ تم لاالہ الا اللہ محمد رسول اللہ کی شہادت دو نماز قائم کرو، زکوۃ ادا کرو، بیت اللہ کا حج کروماہ صیام کے روزے رکھو، اور تم ظاہر کے مکلف ہو لہٰذا کسی کے اندرونی معاملات کی ٹوہ میں نہ پڑو، اور ہر ایسی چیز کے اختیار کرنے سے اجتناب کرو جس سے حیا کی جاتی ہے پھر اگر تم اللہ سے ملاقات کرو تو کہہ دینا مجھے ان باتوں کا عمرنے حکم دیا تھا۔ شعب الایمان ، الاصبہانی فی الحجہ۔
علامہ بیہقی نے فرمایا کہ امام بخاری نے فرمایا کہ یہ حدیث مرسل ہے کیونکہ حضرت حسن نے حضرت عمر کر نہیں پایا، سعید بن عبدالرحمن اجمعحی کے حوالہ سے آئندہ آنے والی مسند ابن عمر میں یہ حدیث اس مرسل مذکورہ سے زیادہ اصح ہے۔