13670 سیف بن عمر روایت کرتے ہیں کہ ربیع، ابوالمجالد، ابوعثمان اور ابو حارثہ کہتے ہیں کہ حضرت ابوعبیدۃ (رض) نے حضرت عمر (رض) کو لکھا کہ مسلمانوں کا ایک گروہ شراب نوشی کا مرتکب ہوا ہے، جن میں ضرار اور ابوجندل بھی شامل ہیں۔ ہم نے ان سے باز پرس کی تو انھوں نے تاویل پیش کی کہ ہم کو اختیار دیا گیا تھا اور ہم نے شراب کو اختیار کرلیا۔ وہ اس طرح کہ اللہ نے فرمایا : فھل انتم منتھون، یا تم شراب سے باز آنے والے ہو ؟ اور اللہ پاک نے تاکیداً حکم نہیں دیا۔
چنانچہ حضرت عمر (رض) نے لکھا کہ یہ بات تو ان کے اور ہمارے درمیان ہے۔ لیکن فھل انتم منتھون کا مطلب ہے فانتھوا یعنی باز آجاؤ۔
پھر حضرت عمر (رض) نے اصحاب کرام کو جمع فرمایا ان کا اس بات پر اتفاق رائے ہوا کہ شراب نوشی میں اسی کوڑے مارے جائیں اور جان جانے کی صورت میں ضمان دیں (یعنی دیت ادا کریں) اور جو اس طرح کی تاویل کرے (قرآن میں اور شراب نوشی کو جائز سمجھے) اگر وہ نہ مانے تو اس کو قتل کردیا جائے۔ اور رسول اللہ (صلی اللہ علیہ وآلہ وسلم) جس چیز کی تفسیر فرما گئے ہیں پھر بھی کوئی اس کے خلاف تفسیر بیان کرے (مذکورہ مثال کی طرح) تو اس کو زجروتنبیہ کی جائے اور (باز نہ آنے کی صورت میں) قتل کیا جائے۔
بالآخر حضرت عمر (رض) نے حضرت ابوعبیدہ (رض) کو لکھا : ان لوگوں کو بلاؤ اور اگر ان کا گمان ہو کہ یہ حلال ہے تو ان کو قتل کردو۔ اور اگر ان کا گمان ہو کہ وہ حرام ہے تو ان کی شراب نوشی کے جرم میں اسی کوڑے مارو۔ چنانچہ حضرت ابوعبیدہ (رض) نے مے نوشوں کو بلایا۔ اور تمام لوگوں کے سامنے ان سے سوال کیا تو انھوں نے کہا : شراب حرام ہے۔ لہٰذا حضرت ابوعبیدہ (رض) نے ان کو اسی اسی کوڑے لگوائے اور غلط تفسیر کرنے والوں کو بھی سزا دی گئی۔ وہ بھی اپنی حرکت پر نادم ہوئے۔ حضرت ابوعبیدہ (رض) نے لوگوں کو فرمایا : اے اہل شام ! اب تمہارے اندر کو مصیبت اترے گی۔ چنانچہ اس سال قحط سالی پیش آئی اور اس سال کو عام الرمادۃ کہا جانے لگا۔ النسائی