13680 یعقوب بن عتبہ سے مروی ہے کہ حضرت ابوعبیدۃ بن الجراح (رض) نے وبرۃ بن رومان البکلی کو حضرت عمر بن خطاب (رض) کے پاس پیغام دے کر بھیجا کہ شام میں لوگ شراب نوشی میں بڑھتے جارہے ہیں۔ حالانکہ میں چالیس کوڑے مارتا ہوں۔ لیکن مجھے نہیں محسوس ہوتا کہ کوڑوں کی اتنی تعداد ان کو اس کام سے روک دے گی۔
چنانچہ حضرت عمر (رض) نے لوگوں سے مشورہ کیا۔ حضرت علی (رض) نے فرمایا : میرا خیال ہے کہ آپ شرب خمر کی حد کو حد تہمت کے برابر طے فرمادیں کیونکہ آدمی جب شراب نوشی کرتا ہے تو ہرزہ سرائی (بےسوچے سمجھے بکواس) کرتا ہے۔ اور جب ہرزہ سرائی کرتا ہے تو تہمت بھی لگا دیتا ہے۔
چنانچہ حضرت عمر (رض) نے اتنے کوڑے مارے اور ابوعبیدہ (رض) کو بھی لکھ بھیجا۔ انھوں نے بھی ملک شام میں یہی تعداد طے فرمادی۔ ابن جریر