13713 (عبداللہ بن مسعود کے شاگرد) علقمہ (رح) سے مروی ہے کہ حضرت ابن مسعود (رض) ملک شام میں تھے۔ آپ (رض) نے مجھے فرمایا : ہمیں کچھ پڑھ کر سناؤ چنانچہ میں نے ان کو سورة یوسف پڑھ کر سنائی۔ ایک حاضر مجلس آدمی نے کہا : یہ اس طرح نازل نہیں ہوئی۔ حضرت عبداللہ بن مسعود (رض) نے اس کو فرمایا : افسوس ہے تجھ پر، میں نے یہ سورت اسی طرح رسول اللہ (صلی اللہ علیہ وآلہ وسلم) کو پڑھ کر سنائی تو آپ نے مجھے فرمایا : احسنت بہت اچھا پڑھا۔ پھر آپ (رض) نے اس آدمی میں شراب کی بو سونگھی تو فرمایا تو ناپاک چیز پیتا ہے اور قرآن کو جھٹلاتا ہے۔ میں اپنی جگہ سے نہ اٹھوں گا جب تک کہ تجھے حد جاری نہ کردی جائے۔ الجامع لعبد الرزاق