13739 عروۃ بن الزہیر سے مروی ہے کہ ابوالازور، ضرار بن الخطاب اور ابوجندل بن سہیل بن عمرو نے ملک شام میں شراب نوشی کی۔ ان کو امیر لشکر ابوعبیدۃ بن الجراح کے پاس لایا گیا۔ ابوجندل بولے : اللہ کی قسم ! میں نے شراب ایک تاویل پر پی ہے، میں نے اللہ پاک کا فرمان سنا ہے : لیس علی الذین آمنوا وعملو الصالحات جناح فیما طعموا اذا ما اتقوا وآمنوا واعملو الصالحات،
ان لوگوں پر جو ایمان لائے اور اچھے اچھے عمل کیے کوئی حرج نہیں اس میں جو وہ کھائیں جبکہ وہ تقویٰ اختیار کریں اور ایمان لائیں اور اچھے اچھے عمل کریں۔
چنانچہ حضرت ابوعبیدۃ (رض) نے ان کا معاملہ حضرت عمر (رض) کو لکھ بھیجا۔ ادھر ابوالازور نے حضرت ابوعبیدۃ (رض) کو عرض کیا : کہ ہمارا دشمن ہمارے سامنے آچکا ہے۔ اگر آپ مناسب سمجھیں تو ہماری سزا کچھ موخر کردیں تاکہ کل ہم دشمن سے مقابلہ کریں اگر اللہ نے ہم کو شہادت کے ساتھ نواز دیا تو آپ کے لیے یہ کافی ہوگا۔ اور آپ کو حد شراب ہم پر قائم کرنے کی ضرورت نہیں رہے گی۔ اور اگر ہم لوٹ آئے تو آپ دیکھ لینا کہ خلیفہ نے آپ کو کیا حکم دیا ہے وہ آپ بجا لانا۔ ابوعبیدۃ نے ان کی بات پر ہاں کردی۔ چنانچہ اگلے روز جب مسلمانوں کی دشمنوں سے مڈبھیڑ ہوئی تو ابوالازور جام شہادت نوش کر گئے۔ اس وقت تک حضرت عمر (رض) کا جواب نامہ بھی آگیا کہ جس تاویل نے ابوجندل کو غلطی میں ڈالا ہے اگر اس نے ان کو حجت دیدی ہے لیکن جیسے ہی تم کو میرا یہ خط ملے تم ان پر حد نافذ کردینا۔ چنانچہ ابوعبیدۃ (رض) نے باقی دو بچ جانے والوں کو بلایا اور ان پر حد نافذ فرمادی۔ ابوجندل ایک بڑے سردار کے بیٹے تھے ان کا اپنا بھی ایک رتبہ تھا۔ اس وجہ سے ان کے دل میں اس سزا کی کسک رہ گئی۔ حتیٰ کہ کہا گیا کہ ابوجندل وسوسے میں پڑگئے ہیں۔ ابوعبیدہ نے حضرت عمر (رض) کو یہ صورت حال لکھی کہ میں نے ابو جندگ کو سزا دیدی ہے لیکن ان کے دل میں وسوسے جنم لے رہے ہیں ہمیں ڈر ہے کہ کہیں وہ ہلاک نہ ہوجائے۔ چنانچہ حضرت عمر (رض) نے ابوجندل کو لکھا : اما بعد ! تم کو جس چیز نے غلطی میں ڈالا ہے لیکن اس سزا سے تم کو توبہ مل گئی ہے۔ بسم اللہ الرحمن الرحیم، حم تنزیل الکتاب من اللہ العزیز العلیم غافر الذنب وقابل التوب شدید العقاب ذی الطول لا الہ الا ھو الیہ المصیر۔
لہٰذا جب ابوجندل نے حضرت عمر (رض) کا خط پڑھا تو اس کے سارے وسوسے اور اندیشے ختم ہوگئے۔ گویا وہ بندھی ہوئی رسی سے کھل گئے۔ السنن للبیہقی