13742 حضرت علی (رض) سے مروی ہے فرمایا : میرے پاس ایک اونٹنی وہ تھی جو مجھے جنگ بدر کے مال غنیمت میں سے حصہ میں آئی تھی اور دوسری اونٹنی نبی اکرم (صلی اللہ علیہ وآلہ وسلم) نے مجھے دی تھی مال غنیمت کے خمس میں سے جو اللہ اور اس کے رسول کا حصہ ہوتا ہے۔ جب میں نے فاطمہ بنت نبی (صلی اللہ علیہ وآلہ وسلم) کے ساتھ شب زفاف گزارنے کا ارادہ کیا تو بنی قینقاع کے ایک انگریز کو لیا تاکہ وہ میرے ساتھ چلے اور ہم اذخرگھاس (جو رنگائی کے لیے کام ہوتی تھی) اکٹھی کرکے انگریزوں کو فروخت کرلیں اور اس سے حاصل ہونے والی آمدنی سے میں ولیمہ کا بند و بست کروں۔ چنانچہ (اس کام سے فراغت کے بعد) میں اپنی دونوں اونٹنیوں کے لیے پالان۔ غرارے اور رسی وغیرہ جمع کررہا تھا۔ میری دونوں اونٹنیاں ایک انصار کے کمرے کے پاس باندھ رکھی تھیں۔ حتیٰ کہ جب میں نے ان کے لیے جو جمع کرنا تھا جمع کرلیا تو اپنی اونٹنیوں کے پاس آیا۔ لیکن اس منظر کو دیکھ کر میری آنکھیں بھر آئیں میری دونوں اونٹنیوں کی کوہان کٹی ہوئی تھیں اور ان کے پہلو پھاڑ کر ان کے کلیجے نکال لیے گئے تھے۔ میں نے پوچھا : یہ کام کس نے کیا ہے ؟ لوگوں نے حمزہ بن عبدالمطلب کا نام لیا۔ اور بتایا وہ شراب نوش انصاری گروہ کے ساتھ اس گھر میں شراب نوشی کررہے ہیں۔ ان کے پاس ایک گانے والی باندی ہے اور ان کے ساتھی ہیں۔ باندی نے اپنے گانے کے دوران کہا تھا :
الایا حمز للشرف النواء،
اے حمزہ ! دیکھ تو، کیسی فربہ اور عمدہ اونٹنیاں ہیں۔
چنانچہ حضرت حمزۃ نے کود کر تلوار اٹھائی اور اونٹنیوں کے کوہان کاٹ ڈالے اور ان کے پہلو پھاڑ کر ان کے کلیجے نکال لیے۔
میں یہ ساری صورت حال جان کر نبی اکرم (صلی اللہ علیہ وآلہ وسلم) کے پاس گیا۔ آپ کے پاس زید بن حارثہ بھی تھے۔ نبی (صلی اللہ علیہ وآلہ وسلم) نے میرے چہرہ کے کرب کو بھانپ لیا اور پوچھا : تجھے کیا ہوا ؟ میں نے عرض کیا : یارسول اللہ ! آج جیسی تکلیف مجھے کبھی نہیں ہوئی۔ حمزہ نے میری اونٹنیوں پر ظلم ڈھادیا ہے ان کے کوہان کاٹ دیئے اور ان کے پہلو چاک کرکے (ان کے کلیجے نکال لیے ہیں) ۔
اور اس وقت وہ اپنے شراب نوش ساتھیوں کے ساتھ ادھر کمرے میں بیٹھے ہیں۔ چنانچہ رسول اللہ (صلی اللہ علیہ وآلہ وسلم) نے اپنی چادر منگوائی اور چادر اوڑھ کر اٹھ کھڑے ہوئے۔ میں اور زید بن حارثہ بھی آپ کے پیچھے پیچھے ہولیے۔ حتیٰ کہ آپ حمزہ والے کمرے پر آپہنچے۔ آپ نے اجازت لی۔ اور اجازت ملنے پر اندر تشریف لے گئے۔ آپ نے حمزہ (رض) کو لعن طعن اور ملامت کی۔ حمزہ شراب کے نشہ میں چور اور سرخ آنکھیں کیے ہوئے تھے۔ حمزۃ (جو آپ کے چچا تھے) نے آپ کی طرف نظر اٹھائی پہلے گھٹنوں پر نظر مرکوز رکھی پھر پیٹ تک نظر اٹھائی پھر اپنی آنکھیں آپ کے چہرے میں گاڑ دیں اور بولے : تم سب میرے باپ کے غلام ہو۔ نبی اکرم (صلی اللہ علیہ وآلہ وسلم) جان گئے کہ ابھی وہ نشہ میں دھت ہیں۔ چنانچہ آپ (صلی اللہ علیہ وآلہ وسلم) الٹے پاؤں واپس ہولیے اور ہم بھی آپ کے پیچھے پیچھے نکل آئے۔ البخاری، مسلم، ابوداؤد، ابوعوانۃ، مسند ابی یعلی، ابن حبان السنن للبیہقی