13746 ابن عمر (رض) سے مروی ہے کہ میں ایک حج یا عمرے کے دوران حضرت عمر (رض) کے ساتھ تھا۔ ہم کو ایک سوار شخص ملا حضرت عمر (رض) نے فرمایا : میرا خیال ہے ، یہ شخص ہماری ہی تلاش میں ہے۔ وہ شخص ہمارے سامنے آکر رونے لگا۔ حضرت عمر (رض) نے پوچھا : تم کو کیا ہوا ؟ اگر تم مقروض ہو تو ہم تمہاری مدد کریں گے، اگر تم خوفزدہ ہو تو ہم تم کو امن دیں گے، ہاں مگر تم نے قتل کیا ہے تو تم کو اس کے بدلے قتل کیا جائے گا، اور اگر تم کسی قوم کے ساتھ رہنے میں تکلیف میں مبتلا ہو تو ہم تم کو وہاں سے اور جگہ منتقل کردیں گے۔ آدمی نے اپنی رواداد سنائی : میں نے شراب نوشی کا ارتکاب کرلیا تھا۔ میں بنی تیم کا فرد ہوں۔ ابو موسیٰ (جو آپ کی طرف سے ہمارے گورنر ہیں) نے مجھے پر حد جاری کی (اس قدر تو ٹھیک تھا مگر پھر) میرا سر منڈوایا، میرا چہرہ کالا کیا اور مجھے لوگوں میں پھرایا اور ان کو یہ حکم دیا کہ کوئی اس کے ساتھ اٹھے نہ بیٹھے اور نہ اس کے ساتھ کوئی کھائے پئے۔ اب میرے دل میں تین خیال آرہے ہیں یا تو میں کوئی تلوار لوں اور ابو موسیٰ کو قتل کردوں۔ یا آپ کے پاس آؤں اور آپ مجھے ملک شام بھیج دیں وہاں مجھے کوئی نہیں جانتا یا پھر میں دشمنوں کے ساتھ جاملوں اور ان کے ساتھ کھاؤں رہوں (آدمی کی درد بھری بپتا سن کر) حضرت عمر (رض) روپڑے اور فرمایا : مجھے ہرگز خوشی نہیں ہوئی کہ تیرے ساتھ یہ یہ کچھ ہوا اور عمر اس حال میں مطمئن ہے۔ جاہلیت میں میں سب سے بڑا شراب نوش تھا۔ یہ زنا کی طرح بڑا جرم نہیں ہے۔ پھر آپ (رض) نے ابوموسیٰ (رض) کو لکھا : تم کو میرا سلام ہو، اما بعد ! فلاں بن فلاں تیمی نے مجھے اس اس طرح ساری خبر کہہ سنائی ہے اور مجھے پاک پروردگار کی قسم ہے ! اگر دوبارہ تم نے اس طرح کی کوئی حرکت کی تو میں تمہارا چہرہ کالا کرکے تم کو لوگوں میں پھر اؤں گا۔ اگر تم میری اس بات کی اہمیت کو سمجھتے ہو تو لوگوں کو حکم دو کہ اس کے ساتھ اٹھیں بیٹھیں اور کھائیں پئیں۔ اگر یہ شراب نوشی سے توبہ کرلے تو اس کی شہادت بھی قبول کریں۔ پھر آپ (رض) نے اس کو سواری کا جانور اور دو درہم عطیہ پیش کرکے رخصت کیا۔ السنن للبیہقی