13750 عبداللہ بن عامر بن ربیعہ سے مروی ہے کہ حضرت عمر (رض) نے قدامۃ بن مظعون کو بحرین کا گورنر بنادیا۔ قدامہ حفصہ اور عبداللہ بن عمر کے ماموں یعنی حضرت عمر (رض) کے سالے تھے۔ جارود جو قبیلہ عبدالقیس کے سردار تھے وہ بحرین سے حضرت عمر (رض) کے پاس تشریف لائے۔ انھوں نے عرض کیا : یا امیر المومنین ! قدامہ نے شراب پی ہے اور نشہ میں دھت ہوئے ہیں۔ اور مجھ پر لازم ہے کہ جب میں حدود اللہ میں سے کوئی حد دیکھوں تو اس کو آپ تک پہنچاؤں ۔ حضرت عمر (رض) نے پوچھا : تمہارے ساتھ اور کون گواہی دیتا ہے ؟ جارود بولے : ابو ہریرہ ! پوچھا : تم کس بات کی شہادت دیتے ہو ؟ انھوں نے عرض کیا : میں نے قدامہ کو شراب پیتے نہیں دیکھا مگر نشہ کی حالت میں قے کرتے دیکھا ہے۔ حضرت عمر (رض) نے فرمایا : تم نے اپنی طرف سے پوری طرح بلکہ اس سے بھی بڑھ کر شہادت ادا کردی ہے (اب تم زیادہ مبالغہ نہ کرو پھر حضرت عمر (رض)) نے قدامہ کو بحرین سے آنے کا لکھا۔ وہ تشریف لے آئے۔ چارود ان کی طرف اشارہ کرتے ہوئے اٹھے : اس پر کتاب اللہ (کا حکم) نافذ کیجئے۔ حضرت عمر (رض) نے جارود کو فرمایا تم گواہ ہو یا دشمن ہو ؟ جارود بولے : گواہ۔ آپ نے فرمایا : تم بولے : میں تمہیں ان کا دشمن سمجھتا ہوں اور (اس طرح تمہاری گواہی معتبر نہیں رہی جبکہ) تمہارے ساتھ صرف ایک آدمی نے گواہی دی ہے۔ جارود بولے : میں آپ کو اللہ کا واسطہ دیتا ہوں (کہ آپ ان پر اللہ کی حد کو جاری کریں) حضرت عمر (رض) نے فرمایا : تم اپنی زبان تھام لو ورنہ میں تمہارے ساتھ براسلوک کروں گا۔ پھر حضرت ابو ہریرہ (رض) نے حضرت عمر (رض) کو فرمایا : اگر تم کو ہماری شہادت میں شک ہے تو ھندبنت الولید کے پاس پیغام بھیج کر ان سے معلوم کرلو، جو قدامہ کی بیوی ہے۔ چنانچہ حضرت عمر (رض) نے ہند بنت الولید کے پاس پیغام بھیجا اس نے بھی اپنے شوہر کے خلاف شہادت پیش کردی۔ تب حضرت عمر (رض) نے قدامہ کو فرمایا : میں آپ پر حد لگاؤں گا۔ قدامہ بولے : اگر میں نے شراب پی ہے جیسا کہ یہ کہہ رہے ہیں تب بھی تمہارے لیے مجھے حد لگانے کی گنجائش نہیں ہے، حضرت عمر (رض) نے پوچھا : وہ کیوں ؟ حضرت قدامہ بولے : اللہ تعالیٰ کا فرمان ہے :
لیس علی الذین آمنووعملوا الصالحات جناح فیما طعموا
جو لوگ ایمان لائے اور اچھے اچھے عمل کیے ان پر کوئی حرج نہیں ہے اس میں جو انھوں نے کھایا۔
حضرت عمر (رض) نے ان کو فرمایا : تم تاویل کرنے میں غلطی کررہے ہو۔ اگر تم تقویٰ اختیار کرتے تو اللہ کی حرام کردہ شے سے اجتناب کرتے ۔ پھر حضرت عمر نے لوگوں کی طرف متوجہ ہو کر پوچھا تم لوگ قدامہ کو حد لگانے میں کیا رائے دیتے ہو ؟ لوگوں نے کہا : جب تک یہ مریض ہیں ہمارا خیال ہے کہ تب تک آپ ان کو حد جاری نہ کریں۔ چنانچہ حضرت عمر (رض) چند ایام تک اس مسئلے میں خاموش رہے۔ پھر ایک دن صبح کو حد لگانے کا پختہ عزم کرلیا۔ اور اپنے ساتھیوں سے پوچھا : اب تمہارا کیا خیال ہے قدامہ کو حد لگانے کے متعلق ؟ ساتھیوں نے وہی بات کی کہ جب تک وہ بیمار ہیں ان کو حد جاری کرنا درست نہیں۔ آپ (رض) نے فرمایا : یہ اللہ سے ملاقات ہی کرلیں کوڑے کھاتے ہوئے یہ مجھے زیادہ پسند ہے بنسبت اس بات کے کہ ان کو حد لگانا میری گردن پر باقی رہ جائے۔ چنانچہ حضرت عمر (رض) نے حکم دیا کہ ان کو حد لگائی جائے۔ اور آخر ان کو حد لگادی گئی۔ پھر حضرت عمر (رض) نے حج کیا تو قدامہ نے بھی ان کے ساتھ حج کیا لیکن ناراضگی اور ناگواری کے ساتھ۔ جب دونوں حضرات حج سے واپس ہوئے اور حضرت عمر (رض) سفیا مقام پر اترے تو وہاں آرام کرنے کے لیے سوگئے۔ جب نیند سے بیدار ہوئے تو بولے : قدامہ کو جلدی میرے پاس لاؤ۔ میں نے خواب دیکھا ہے کہ ایک آنے والا میرے پاس آیا اور بولا قدامہ سے صلح کرلو کیونکہ وہ تمہارا بھائی ہے۔ لیکن جب لوگ ان کو بلانے گئے تو انھوں نے آنے سے انکار کردیا۔ لہٰذا حضرت عمر (رض) خود ان کے پاس چل کر تشریف لے گئے اور ان کے لیے استغفار کیا۔ یہ ان کی باہمی صلح کا پہلا واقعہ تھا۔ مصنف عبدالرزاق، ابن وھب، السنن للبیہقی