13786 ابن نیاق سے مروی ہے کہ خلیفہ حضرت عمر بن خطاب (رض) (ملک شام) تشریف لائے آپ کے بدن پر کھردرے کپڑے کی ایسی میلی بوسیدہ قمیص تھی جو میل کچیل کی وجہ سے پھٹنے کے قریب تھی۔ میں نے عرض کیا : یا امیر المومنین ! میں آپ کی یہ قمیص نہ دھودوں ؟ آپ نے فرمایا : چاہو تو دھو سکتے ہو۔ ابن نیاق کہتے ہیں : چنانچہ میں نے ایک دوسری قبطی قمیص لاکر آپ کو دی آپ نے وہ زیب تن فرمالی۔ لیکن جب آپ (رض) نے اس کا ملائم پن محسوس کیا توبولے : افسوس ! اے ابن نیاق ! مجھے میری ہی قمیص لادو۔ میں قمیص لے آیا جو ابھی خشک نہیں ہوئی تھی۔ پھر میں آپ کو ایک کمرے میں (آرام کے لئے) لایا۔ آپ (رض) نے اس میں کوئی تصویر دیکھی۔ چنانچہ آپ (رض) نے کمرے میں داخل ہونے سے انکار کردیا۔ پھر میں آپ کے پاس شہد لے کر آیا ۔ آپ نے شہد نوش فرمایا۔ پھر فرمایا : یہ لوگوں کو عام میسر نہیں ہے۔ ایسا کوئی دوسرا مشروب ہے جو سب کو بآسانی دستیاب ہوسکے۔ ابن نیاق کہتے ہیں میں نبیذ لے کر آپ کے پاس آیا جس کا دو ثلث (دو تہائی) پکا کر ختم کردیا گیا تھا۔ آپ نے اس کو دیکھا تو فرمایا : یہ اونٹوں کے نبیذ کے کس قدر مشابہ ہے۔ پھر حضرت عمر (رض) نے وہ مشروب ایک آدمی کو پینے کے لیے دیا اس نے پیا تو آپ نے پوچھا : کیا (دماغ میں) سرسراہٹ تو نہیں ہے ؟ کیا کچھ (نشہ وغیرہ تو نہیں) ہے ؟ آدمی نے کہا : نہیں۔ پھر آپ نے وہ مشروب دوبارہ اس کو پلایا پھر پوچھا : کیا اب کچھ سرسراہٹ ؟ کچھ اور ہوا ؟ آدمی نے کہا : نہیں۔ پھر آپ (رض) نے تیسری مرتبہ وہ مشروب پلایا اور پوچھا : کچھ محسوس کیا ؟ عرض کیا : نہیں۔ پھر حضرت عمر (رض) نے اس کو فرمایا : اچھا اٹھو اور چل کر دکھاؤ۔ وہ چل کر واپس آیا۔ پھر آپ (رض) نے دوبارہ پوچھا : کچھ سرسراہٹ ہے ؟ کوئی نشہ ہے ؟ اس نے کہا نہیں۔ تب آپ (رض) نے فرمایا : ٹھیک ہے لوگوں کو یہ مشروب مہیا کرو۔ اور پھر کوفہ میں حضرت سعد (رض) کو بھی اس کا حکم لکھ دیا۔ ابن عساکر