13866 حضرت عائشہ (رض) سے مروی ہے کہ ایک سیاہ فام آدمی حضرت ابوبکر (رض) کے پاس آیا کرتا تھا۔ آپ (رض) (شفقت کے ساتھ) اس کو اپنے قریب کرتے اور اس کو قرآن کی تعلیم دیا کرتے تھے۔ ایک مرتبہ حضرت ابوبکر (رض) نے کسی کو اموال زکوۃ کی وصولی کے لیے یا کسی بطور عسکری لشکر کے بھیجا۔ سیاہ فام بولا : مجھے بھی ان کے ساتھ بھیج دیں۔ حضرت ابوبکر (رض) نے اس کو فرمایا : تو تو ہمارے پاس ہی رہ۔ لیکن وہ نہ مانا۔ آخر حضرت ابوبکر (رض) نے اس کو اس کے ساتھ بھیج دیا اور (جاتے وقت) اس کو اچھائی کی نصیحت کی۔ پھر تھوڑا عرصہ نہ گزرا تھا کہ وہ اس حال میں آیا کہ اس کا ہاتھ کٹا ہوا تھا۔ حضرت ابوبکر (رض) نے اس کو دیکھا تو آپ کی آنکھیں بھر آئیں۔ آپ (رض) نے سیاہ فام سے پوچھا : تجھے کیا ہوگیا ؟ اس نے عرض کیا : میں نے اور کچھ تو نہیں کیا ۔ وہ مجھے (زکوۃ وصولی وغیرہ کے) کام پر بھیجا کرتے تھے۔ میں نے ایک زکوۃ میں خیانت کرلی اور انھوں نے میرا ہاتھ کاٹ دیا۔ حضرت ابوبکر (رض) نے (لوگوں) کو مخاطب ہو کر فرمایا : یہ شخص جس کا ہاتھ کاٹا گیا ہے تم دیکھنا یہ بیس سے زائد مرتبہ خیانت کرے گا۔ پھر (اس کو) فرمایا اللہ کی قسم ! اگر میری بات سچ نکلی تو میں تجھے اس جرم میں بالآخر قتل کردوں گا۔ پھر آپ (رض) نے اس کو اپنے قریب ہی ٹھہرالیا اور اس کو تنہا نہ چھوڑتے تھے۔ وہ سیاہ کیا کرتا رات کو اٹھ کر نماز میں قرآن پڑھتا۔ حضرت ابوبکر (رض) اس کی آواز سنتے تو فرماتے : تیری رات چوری کرنے والے کی رات نہیں ہے۔ پھر وہ ایک مرتبہ تھوڑی دیر کے لیے غائب ہوا تھا کہ اس کے بعد حضرت ابوبکر (رض) کے گھر والوں کے زیور اور دوسرا سامان چوری ہوگیا۔ حضرت ابوبکر (رض) نے فرمایا : آج رات ہی چور ہاتھ آجائے گا۔ دوسری طرف کیے ہوئے ہاتھ والا (سیاہ فام) قبلہ رو ہو کر اور ایک سالم ہاتھ اور دوسرا کٹا ہوا ہاتھ بلند کرکے دعا کرنے (اور ابوبکر (رض)) کے گھر والوں کو اپنی پاکدامنی سنانے کے لیے کہنے لگا : اے اللہ ! جس نے اس نیک گھر والوں کی چوری کی ہے اس کو ظاہر کردے۔ چنانچہ اس کی دعا قبول ہوگئی ابھی دن آدھا نہیں ہوا تھا کہ آل ابوبکر نے اپنا سامان اسی کے پاس پالیا۔ تب حضرت ابوبکر (رض) نے اس کو ارشاد فرمایا : افسوس ہے تجھ پر، تو اللہ کی طاقت کو نہیں جانتا۔ پھر آپ (رض) نے اس کے لیے حکم دیدیا اور اس کا ایک پاؤں کاٹ دیا گیا۔ حضرت ابوبکر (رض) فرمایا کرتے تھے : مجھے اس کی چوری سے زیادہ اس کی اللہ پر جرات زیادہ غصہ دلاتی ہے کہ وہ ہم کو سنانے کے لیے اللہ سے دعا کررہا ہے کہ اے اللہ چور کو ظاہر کردے۔ یہ اس کی اللہ پر جرات ہی تو ہے۔ الجامع لعبد الرزاق، السنن للبیہقی