13943 ابن جریج (رح) سے مروی ہے کہ مجھے یحییٰ بن سعید نے بتایا کہ حضرت سعید بن المسیب (رح) فرماتے ہیں : حضور نبی اکرم (صلی اللہ علیہ وآلہ وسلم) کے پاس ایک عورت لائی گئی۔ یہ عورت قریش کے بڑے گھروں میں سے ایک گھر کا حوالہ دے کر کئی گھروں میں گئی اور بولی فلاں فلاں گھر والے تم سے یہ یہ چیزیں عاریت پر مانگتے ہیں۔ لوگوں نے اس کو مطلوبہ مال دیدیا۔ پھر یہ لوگ فلاں گھر میں گئے لیکن انھوں نے سرے سے انکار کردیا کہ انھوں نے کوئی چیز عاریت پر نہیں مانگی پھر اس عورت سے بات کی تو اس نے اس بات سے انکار کردیا کہ اس نے کوئی چیز نہیں لی نبی اکرم (صلی اللہ علیہ وآلہ وسلم) نے اس کا ہاتھ کاٹ دیا۔
ابن جریج ابن المنکدر سے روایت کرتے ہیں کہ پھر اس عورت کو اسید بن حضیر کی بیوی نے اپنے گھر میں پناہ دی۔ اسید جب گھر آئے تو دیکھا کہ ان کی بیوی نے اس عورت کو گھر ٹھہرا رکھا ہے۔ انھوں نے کہا : میں کپڑے نہیں رکھوں گا جب تک نبی (صلی اللہ علیہ وآلہ وسلم) سے اس کے متعلق نہ پوچھ آؤں۔ چنانچہ انھوں نے آکر آپ (صلی اللہ علیہ وآلہ وسلم) سے اس کا ذکر کیا تو آپ (صلی اللہ علیہ وآلہ وسلم) نے فرمایا : تمہاری بیوی نے اس پر ترس کھایا ہے اللہ اس پر ترس کھائے۔ الجامع لعبد الرزاق