13992 اشیاخ (کئی بزرگوں) سے منقول ہے کہ مہاجرین ابی امیہ جو یمامہ کے امیر تھے ان کے پاس دو گلوکارہ عورتوں کا مسئلہ اٹھایا گیا۔ ایک نے گانے کے دوران نبی اکرم (صلی اللہ علیہ وآلہ وسلم) کو سب وشتم کی (گالی دی) تھی۔ مہاجر نے اس کا ہاتھ کاٹ دیا اور اس کے سامنے کے چار دانت نکلوادئیے۔ اسی طرح دوسری عورت جس نے گانے میں مسلمانوں کی ہجو (برائی) کی تھی۔ مہاجربن ابی امیہ نے اس کا بھی ہاتھ کٹوادیا اور سامنے کے صرف دو دانت نکلوادیئے۔
حضرت ابوبکر (رض) نے مہاجر کو لکھا : مجھے اس عورت کی خبر ملی ہے جس نے آپ (صلی اللہ علیہ وآلہ وسلم) کو گالی دی تھی اور تم نے اس کو جو سزا دی اگر مجھے پہلے علم ہوجاتا تو میں تم کو اس عورت کے قتل کرنے کا حکم دیتا۔ کیونکہ انبیاء کی حد۔ ان کو گالی دینے کی سزا عام لوگوں کو گالی دینے کی طرح نہیں عام حدود کی طرح نہیں ہیں۔ اور جو مسلمان ایساکرے وہ مرتد ہے، یا پھر وہ کوئی معاہد (ذمی) ہے یا وہ محاربی غادر (کافر ملک کا کافر، دھوکا باز) ہے۔ اور جس عورت نے مسلمانوں کی برائی کی ہے اگر وہ اسلام کا دعویٰ کرنے والوں میں سے ہے تو اس کو سزا دی جائے لیکن تم نے جو مثلہ کیا ہے (اس کے جسم کا ناس کیا ہے) اس سے کم۔ اگر وہ کافر ذمی ہے تو میری عمر کی قسم ! تم نے اس کے شرک سے تو گزر کیا جو اس سے بڑا گناہ ہے (تو) اس چھوٹے گناہ سے کیوں درگزر نہ کیا۔ اگر مجھے آئندہ ایسی کوئی شکایت ملی جیسی تم نے دوسری عورت کو سزا دی ہے تو میں تمہارے ساتھ برا سلوک کروں گا۔ قصاص کے سوا لوگوں کو مثلہ کرنے سے احتراز کرو کیونکہ وہ گناہ ہے اور نفرت انگیز ہے۔
سیف فی الفتوح