14066 حضرت ابو ہریرہ (رض) سے مروی ہے فرمایا : قسم ہے اس ذات کی جس کے سوا کوئی معبود نہیں ہے، اگر ابوبکر (رض) کو خلیفہ نہ منتخب کیا جاتا تو اللہ کی عبادت باقی نہ رہتی۔ حضرت ابوہریرہ (رض) نے یہ بات دوبارہ ارشاد فرمائی، پھر تیسری بار ارشاد فرمائی تو آپ کو کسی نے کہا : رک جاؤ ابوہریرہ !
حضرت ابوہریرہ (رض) نے (مزید جوش و خروش سے آپ کی ثابت قدمی کا ایک واقعہ بیان کرتے ہوئے) فرمایا :
رسول اللہ (صلی اللہ علیہ وآلہ وسلم) نے اسامہ بن زید کا لشکر سات سو افراد پر مشتمل ملک شام جنگ کے لیے روانہ فرمایا تھا۔ جب وہ لشکر مقام ذی خشب ، پر اترا تو مدینہ میں نبی اکرم (صلی اللہ علیہ وآلہ وسلم) کا وصال ہوگیا۔ مدینہ کے ارد گرد کے لوگ مرتد ہونے لگے۔ اصحاب نبی (صلی اللہ علیہ وآلہ وسلم) آپ (صلی اللہ علیہ وآلہ وسلم) کے گرد جمع لوگ کہنے لگے : روم جانے والے لشکر کو روک لیا جائے کیونکہ عرب مدینے کی اطراف میں اسلام سے برگشتہ ہورہے ہیں۔ تب حضرت ابوبکر (رض) نے فرمایا : قسم ہے اس ذات کی جس کے سوا کوئی معبود نہیں ۔ اگر کتوں کا غول ازواج مطہرات کو ان کے پاؤں سے کھینچتا پھرے تب بھی میں اس لشکر کو واپس نہیں ہونے دوں گا جس کو رسول اللہ (صلی اللہ علیہ وآلہ وسلم) مہم پر روانہ فرما چکے ہیں اور اس جھنڈے کو نہیں کھولوں گا جو آپ (صلی اللہ علیہ وآلہ وسلم) لہرا چکے ہیں۔
چنانچہ (اسی ثابت قدمی کا نتیجہ تھا کہ) جب بھی اسامہ (رض) کا لشکر ایسے قبائل کے پاس سے گزرتا جو مرتد ہونے کا ارادہ کررہے تھے تو وہ عرب کہنے لگتے : اگر ان کے پاس قوت نہ ہوتی تو اتنا بڑا لشکر ایسے کٹھن موقع پر نہ نکلتا۔ لہٰذا ہم مرتد ہونے کو فی الحال موقوف رکھتے ہیں جب تک کہ ان کے دشمن سے مڈبھیڑ نہ ہوجائے۔
چنانچہ پھر مسلمانوں کا لشکر رومیوں سے ٹکرایا اور ان کو شکست فاش دیدی ادھر یہ (خبر سن کر مرتد ہونے کا ارادہ کرنے والے بھی باز آگئے اور دین پر) ثابت قدم ہوگئے۔
الصابونی فی المائتین، السنن للبیہقی، ابن عساکر
اس روایت کی سند حسن ہے۔