14069 حضرت عائشہ (رض) سے مروی ہے کہ حضرت فاطمہ (رض) نے پیغام بھیجا اور رسول اللہ (صلی اللہ علیہ وآلہ وسلم) کی میراث کا مطالبہ کیا جو اللہ پاک نے بطور مال غنیمت کے رسول اللہ (صلی اللہ علیہ وآلہ وسلم) کو عطا فرمائی تھی۔ دراصل حضرت فاطمہ (رض) نبی (صلی اللہ علیہ وآلہ وسلم) کے اس صدقہ کو مانگ رہی تھیں جو (بطور اراضی) مدینہ میں تھا، باغ فدک (جو خیبر میں تھا) اور خیبر کی غنیمت کا مال خمس جو باقی بچ گیا تھا۔ اس تمام مال سے رسول اللہ (صلی اللہ علیہ وآلہ وسلم) اپنے اہل کے نفقات کا بند و بست فرماتے تھے اور اللہ کی راہ میں حاجت مندوں کو تقسیم فرماتے تھے۔
چنانچہ حضرت ابوبکر صدیق (رض) نے ۔ جواب میں ارشاد فرمایا : کہ رسول اللہ (صلی اللہ علیہ وآلہ وسلم) کا فرمان ہے : ہم (دنیاوی مال کا) کسی کو وارث بنا کر نہیں جاتے۔ جو ہم چھوڑ کر جاتے ہیں وہ صدقہ ہوتا ہے۔ آل محمد اس مال یعنی اللہ کے مال میں سے کھاتے رہیں گے لیکن ان کے لیے کھانے پینے سے زیادہ اس میں تصرف کرنے کا حق نہ ہوگا۔ حضرت ابوبکر (رض) نے فرمایا :
اللہ کی قسم میں نبی اکرم (صلی اللہ علیہ وآلہ وسلم) کے صدقات کو اس حالت سے تبدیل نہیں کرسکتا جس حالت پر وہ نبی اکرم (صلی اللہ علیہ وآلہ وسلم) کے زمانے میں تھے۔ نیز میں ان صدقات میں نبی (صلی اللہ علیہ وآلہ وسلم) جس طرح تصرف فرماتے تھے اسی طرح تصرف کرتا رہوں گا۔
چنانچہ حضرت ابوبکر (رض) حضور (صلی اللہ علیہ وآلہ وسلم) کے طریقے پر گامزن رہے اور ان اموال (یعنی زمینوں وغیرہ) کو کسی کو دینے سے انکار کردیا۔ جس کی وجہ سے حضرت فاطمہ (رض) کے دل میں ابوبکر (رض) کی طرف سے ناراضگی بیٹھ گئی۔ چنانچہ حضرت ابوبکر (رض) نے ارشاد فرمایا : قسم ہے اس ذات کی جس کے ہاتھ میں میری جان ہے ! رسول اللہ (صلی اللہ علیہ وآلہ وسلم) کی رشتہ داری مجھے بہت محبوب ہے اس سے کہ میں اپنی رشتہ داری قائم کروں۔ بہرحال ان صدقات میں جو میرے اور تمہارے درمیان اختلاف واقع ہوگیا ہے میں ان میں حق سے ذرہ پیچھے نہیں ہٹ سکتا اور اس طرز عمل کو ہرگز نہیں چھوڑ سکتا جو میں نے رسول اللہ (صلی اللہ علیہ وآلہ وسلم) کو کرتا دیکھا ہے، میں اسی پر کاربند رہوں گا۔
ابن سعد، مسند احمد، البخاری، مسلم، ابوداؤد، النسائی، ابن الجارود، ابوعوانۃ، ابن حبان، السنن للبیہقی