14073 عروہ (رح) سے مروی ہے کہ جب حضرت ابوبکر (رض) کو والی بنایا گیا تو انھوں نے خطبہ دیا ۔ پہلے اللہ کی حمدوثناء کی پھر ارشاد فرمایا :
اے لوگو ! مجھے تمہارا والی بنایا گیا ہے، لیکن میں کوئی تم سے بڑھ کر انسان نہیں ہوں۔ لیکن قرآن نازل ہوا اور نبی (صلی اللہ علیہ وآلہ وسلم) نے سنت کو رائج فرمایا ہم کو سکھایا اور ہم سیکھ گئے۔ پس تم بھی جان لو کہ عقل مندوں کا عقل مند صاحب تقویٰ ہے اور بیوقوفوں کا بیوقوف مبتلائے فسق وفجور ہے۔ تمہارا طاقت ور شخص میرے نزدیک کمزور ہے جب تک میں اس سے حق وصول نہ کرلوں، تمہارا کمزور میرے نزدیک طاقت ور ہے جب تک میں اس کو حق نہ دلوادوں۔ اے لوگو ! میں محض اتباع کرنے والا ہوں نئی راہ ایجاد کرنے والا نہیں ہوں۔ اگر میں اچھا کروں تو میری مدد کرو۔ اور اگر غلط راہ پر چلوں تو مجھے سیدھا کردو۔ بس میں اس پر اپنی بات موقوف کرتا ہوں اور اللہ سے اپنے لیے اور تمہارے لیے مغفرت مانگتا ہوں۔ ابن سعد، المحاملی فی امالیہ، الخطیب فی رواۃ مالک