14077 ابن عمر (رض) ، عائشہ (رض) ، سعید بن المسیب (رح) ، صحیۃ الیتمی (رح) اور ابو وجزۃ کے والد (رح) وغیرہ حضرات سے مروی ہے اور ان سب حضرات کی گفتگو کا ماحصل یہ ہے کہ :
حضور (صلی اللہ علیہ وآلہ وسلم) کی وافت بروز پیر بارہ ربیع الاول سن گیارہ ہجری کو ہوئی۔ اس کے بعد حضرت ابوبکر (رض) کی (خلافت پر) بیعت کی گئی۔ آپ (رض) کا گھر سخ (مدینہ کے مضافات میں ایک مقام) پر تھا۔ جہاں قبیلہ بنی حارث بن خزرج کی آپ کی بیوی حبیبہ بنت خارجہ بن زید بن ابی زہیر رہا کرتی تھیں۔
آپ (رض) نے اس کو کھجور کی شاخوں سے ایک حجرہ بنا کر دے رکھا تھا۔ اس گھر میں مزید کچھ اضافہ نہ ہوا تھا کہ آپ (رض) مدینہ منتقل ہوگئے۔ لیکن اس سے قبل اور خلافت کے بعد آپ (رض) چھ ماہ سخ میں قیام پذیر رہے۔ اس دوران آپ (رض) ہر صبح پیدال مدینے تشریف لے جاتے تھے۔ کبھی کبھار اپنے گھوڑے پر بھی چلے جاتے تھے۔ آپ کے جسم پر ایک ازار اور ایک رنگی ہوئی چادر ہوتی تھی۔ آپ (رض) مدینہ جاکر لوگوں کو نماز پڑھاتے : پھر عشاء کی نماز پڑھا کر سخ واپس چلے جاتے تھے۔ جب آپ مدینہ میں حاضر ہوجاتے تو آپ ہی نماز پڑھاتے تھے ورنہ حضرت عمر بن خطاب (رض) نماز پڑھاتے تھے ۔ جمعہ کے دن آپ شروع دن میں گھر پہنچ جاتے اور لوگوں کو جمعہ پڑھاتے تھے۔ آپ (رض) تجارت پیشہ تھے۔ اس لیے آپ ہر روز صبح کو بازار جاتے اور خریدو فروخت کرتے۔ اسی طرح آپ (رض) کا بکریوں کا ایک ریوڑ تھا۔ آپ شاک کو اسے دیکھنے جاتے تھے اور کبھی کبھار خود بھی بکریوں کو لے کر چرانے نکل جاتے تھے۔ ورنہ اکثر اوقات آپ کی بکریاں کوئی اور چراتا تھا۔ آپ (رض) ایک خاندان کی بکریوں کا دودھ بھی دوہا کرتے تھے۔ جب آپ (رض) کی بیعت کرلی گئی تو اس خاندان کی ایک بچی نے کہا : اب تو شاید ہماری بکریوں کا دودھ نہیں نکلا کرے گا۔ یہ بات حضرت ابوبکر (رض) نے سن لی تو آپ (رض) نے ارشاد فرمایا : نہیں بلکہ میری عمر کی قسم ! میں ان کے لیے دودھ دوہوں گا۔ اور مجھے امید ہے کہ میرا یہ نیا کام پرانے کاموں پر اثر انداز نہ ہوگا۔ چنانچہ آپ (رض) پھر بھی ان کے لیے دودھ نکالتے رہے۔ بسا اوقات آپ اس گھرانے کی بچی کو کہتے : تجھے اونٹ کی آواز نکال کر دکھاؤں یا مرغے کی آواز نکال کر دکھاؤں۔ تو وہ جو کہتی آپ اس کو سناتے۔ آپ نے (اسی طرح لوگوں میں گم ہو کر) چھ ماہ بتادیئے۔ پھر آپ مستقل مدینہ آکر رہنے لگے۔ اور نظام حکومت کو مستقل دیکھنے لگے۔ تب آپ (رض) نے کہا : اللہ کی قسم ! لوگوں کی فلاح کے لیے مجھے اپنی تجارت چھوڑنا پڑے گی۔ ان کے لیے (اپنے دوسرے کام کاج سے) فارغ ہونا ضروری ہے۔ اور مستقل ان کی اصلاح و فلاح میں لگنے کی ضرورت ہے، لیکن اپنے اہل خانہ کے لیے بھی معاشی گزر بسر کا انتظام لازمی ہے۔ تب آپ (رض) نے تجارت ترک فرمادی اور آپ (رض) مسلمانوں کے بیت المال میں سے اپنے اہل خانہ کا خرچ لینے لگے۔ آپ (رض) (بیت المال سے) حج اور عمرہ بھی فرماتے۔ صحابہ کرام نے آپ کے لیے سالانہ چھ ہزار درہم مقرر فرمادیئے تھے۔ جب آپ (رض) کی وفات کا وقت قریب آیا تو آپ (رض) نے وصیت کی کہ ہمارے پاس جو بیت المال کا مال ہے وہ لوٹا دو ۔ کیونکہ میں اس مال میں سے کچھ بھی لینا نہیں چاہتا۔ اور میری فلاں فلاں جگہ والی جائیداد مسلمانوں کے لیے ہے اس مال کے بدلے جو میں نے بیت المال میں سے لیا ہے۔ چنانچہ آپ (رض) نے وہ اموال، دودھ والی اونٹنی، ایک غلام اور پانچ درہم کی قیمت کی ایک چادر حضرت عمر (رض) کو واپس بھجوادی۔
حضرت صدیق اکبر (رض) کی اپنے والد سے ملاقات
حضرت عمر (رض) نے فرمایا : انھوں نے اپنے بعد والوں کو سخت مشقت میں ڈال دیا۔ راوی حضرات کہتے ہیں : سن گیارہ ہجری کو حضرت ابوبکر (رض) نے حضرت عمر بن خطاب (رض) کو امیر حج بنا کر بھیجا تھا۔ پھر بارہ ہجری ماہ رجب میں حضرت ابوبکر (رض) نے عمرہ ادا کیا۔ چاشت کے وقت مکہ میں داخل ہوئے۔ وہہاں اپنے گھر میں تشریف لائے جہاں آپ کے والد حضرت ابوقحافہ (رض) (انتہائی ضعیف العمر) اپنے دروازے پر بیٹھے تھے اور ان کے ساتھ کم سن لڑکے بیٹھے تھے جن کو وہ باتیں سنا رہے تھے۔ ان کو کسی نے بتایا کہ یہ آپ کا بیٹا آیا ہے۔ یہ سن کر وہ (خوشی سے) کھڑے ہونے لگے۔ جبکہ حضرت ابوبکر (رض) جو ابھی سواری پر تھے جلدی جلدی سواری سے اترنے لگے اور ابھی اونٹنی بیٹھی بھی نہ تھی آپ (رض) اوپر سے کود آئے اور اپنے باپ کو آواز دینے لگے : ابا جان ! آپ کھڑے نہ ہوں۔ پھر دونوں باپ بیٹے بغل گیر ہوئے۔ حضرت ابوبکر (رض) نے اپن باپ کی پیشانی پر بوسہ دیا۔ ابوقحافہ (رض) اپنے بیٹے کی آمد کی خوشی میں روپڑے۔ مکہ کی طرف عتاب بن اسید، سہیل بن عمرو، عکرمہ بن ابی جھل اور حارث بن ہشام (سرداران قوم) بھی آگئے تھے۔ انھوں نے آپ (رض) کو سلام کیا سلام علیکم اے خلیفہ رسول اللہ ! پھر سب نے آپ (رض) کے ساتھ مصافحہ کیا۔ جب ان کے آپس میں رسول اللہ (صلی اللہ علیہ وآلہ وسلم) (کی یادوں) کا ذکر ہوا تو حضرت ابوبکر (رض) رونے لگے۔ پھر آنے والے معززین نے حضرت ابی قحافہ (رض) کے سلام کی دعا کی۔ حضرت ابوقحافہ (رض) نے اپنے بیٹے کو فرمایا : اے عتیق (ابوبکر (رض) کا لقب ! ) ان سرداروں کے ساتھ اچھی صحبت رکھا کر۔ حضرت ابوبکر (رض) نے فرمایا : اباجان ! اللہ کی مدد کے بغیر نہ بدی سے اجتناب ممکن ہے اور نہ ہی کوئی نیکی اس کی مدد کے بغیر پوری ہوسکتی ہے۔ مجھے ایک عظیم ذمہ داری گلے کا ہار بنادی گئی ہے جس کے اٹھانے کی مجھ میں قوت نہیں ہے۔ اور نہ اللہ کے بغیر کچھ توفیق ممکن ہے۔
پھر حضرت ابوبکر (رض) گھر میں داخل ہوئے۔ غسل کیا اور نکلے۔ آپ کے پیچھے آپ کے اصحاب بھی چلنے لگے۔ آپ (رض) نے فرمایا : اپنے اپنے راستے چلو۔ لوگ آ آ کر بالمشافہ آپ (رض) سے ملتے رہے اور نبی اکرم (صلی اللہ علیہ وآلہ وسلم) کی وفات پر بھی تعزیت کا اظہار کرتے رہے۔ جس کو سن سن کر حضرت ابوبکر (رض) رونے لگے۔ حتیٰ کہ آپ (رض) بیت اللہ شریف پہنچ گئے۔ وہاں پہنچ کر آپ نے اپنی چادر کا اضطباع کیا (الٹا کر زیب تن کی) ۔ پھر رکن (یمانی) کا استلام کیا (بوسہ لیا) پھر سات چکر کعبۃ اللہ کے گرد کاٹے اور دوگانہ نماز ادا کی۔ پھر واپس اپنے گھر چلے گئے۔ جب ظہر کا وقت ہوا تو پھر نکلے اور بیت اللہ کا طواف کیا پھر قریب ہی دارالندوہ کے بیٹھ گئے اور اعلان کیا : کوئی ہے جس کو کسی ظلم کی شکایت کرنا ہو یا کسی کو اپنے حق کا مطالبہ کرنا ہو۔ لیکن پھر کوئی نہ آیا بلکہ لوگوں نے (امن وامان کے حوالے سے) اپنے والی کی بھلائی اور تعریف بیان کی۔ پھر آپ (رض) نے نماز عصر ادا کی اور بیٹھ گئے پھر لوگ آپ سے الوداع ہوئے اور آپ (رض) مدینے کی طرف کوچ کرنے نکل پڑے۔ پھر جب اسی سال یعنی بارہ ہجری کو حج کا وقت آیا تو حضرت ابوبکر (رض) نے خود لوگوں کو حج کروایا اور حج افراد (بغیر عمرے کے) ادا کیا جبکہ مدینہ پر آپ حضرت عثمان (رض) کو خلیفہ بنا آئے تھے۔ ابن سعد
امام ابن کثیر (رح) فرماتے ہیں : یہ اچھی روایت ہے اس کے متعدد شواہد مزید ہیں اور اس کی مثل روایت قبول عام پاتی ہے اور لوگ اس کو قبول کرتے ہیں۔