14091 ابن ابی عون وغیرہ سے مروی ہے کہ حضرت خالد بن ولید (رض) نے دعویٰ کیا کہ مالک بن نویرۃ نے۔ اپنے شاعری کے کلام میں ارتداد کا ارتکاب کرلیا ہے جو ان کو پہنچ گیا ہے۔ لیکن مالک نے اس بات کا خود انکار کردیا اور بولے : میں اسلام پر ثابت قدم ہوں میں نے کوئی اور نہ دین پسند کیا ہے اور نہ اسلام کو بدلا ہے۔ اس بات پر ابوقتادہ (رض) اور ابن عمر (رض) نے بھی شہادت پیش کی (کہ واقعی مالک اپنے اسلام پر قائم ہے) لیکن خالد (رض) نے مالک کو آگے بلایا اور ضرار بن الزور کو حکم دیدیا چنانچہ ضرار نے ان کی گردن اڑا دی۔ پھر خالد (رض) نے مالک کی بیوی پر قبضہ کرلیا۔ حضرت ابوبکر (رض) کو کہنے والے نے کہا : خالد نے (مالک کی بیوی کے ساتھ) زنا کیا ہے لہٰذا ان کو سنگسار کیجئے۔ حضرت ابوبکر (رض) نے فرمایا : میں ان کو سنگسار نہیں کرسکتا کیونکہ انھوں نے تاویل کی تھی جس میں ان سے غلطی ہوگئی (تاویل یہ کی کہ وہ مرتد غیر مسلم کی بیوی ہے اور اس کے قتل کے بعد یہ ان کی قیدی اور باندی بن گئی ہے) ۔ کہنے والے نے حضرت ابوبکر (رض) کو کہا : کہ خالد نے ایک مسلمان (مالک) کو قتل کیا ہے لہٰذا اس کے قصاص میں ان کو قتل کیجئے۔ حضرت ابوبکر (رض) نے فرمایا : میں ان کو قتل بھی نہیں کرسکتا کیونکہ انھوں نے تاویل کی تھی کہ جس میں اس سے غلطی ہوگئی کہ مالک نے ایسا شعر کہا ہے جو اس کے ارتداد کا ثبوت ہے پھر کہنے والے نے کہا : پھر آپ خالد کو (لشکر کی سپہ سالاری سے) معزول کردیں۔ حضرت ابوبکر (رض) نے فرمایا میں کبھی بھی ایسی تلوار کو نیام میں نہیں ڈال سکتا جو اللہ نے کافروں پر سونت لی ہے۔ ابن سعد