14100 محمد بن ابراہیم بن الحارث الیتمی سے مروی ہے کہ جب حضرت ابوبکر (رض) نے خالد بن سعید کو معزول فرمایا تو ان کے متعلق شرحبیل بن حسنہ کو وصیت فرمائی۔ شرحبیل بن حسنہ بھی امراء میں سے تھے (اور کسی لشکر پر امیر تھے) حضرت ابوبکر (رض) نے شرحبیل کو فرمایا : خالد بن سعید کا خیال رکھنا۔ اپنی ذات پر ان کا حق یاد رکھنا ، جس طرح تم چاہتے ہو کہ وہ تمہارا حق یاد رکھیں۔ اگرچہ اب وہ تم پر والی (حاکم) نہیں رہے ہیں۔ لیکن تم اسلام میں ان کا رتبہ جانتے ہو، نیز رسول اللہ (صلی اللہ علیہ وآلہ وسلم) کا انتقال ہوا تو خالد آپ (صلی اللہ علیہ وآلہ وسلم) کی طرف سے امیر (وگورنر) مقرر تھے۔ پھر میں نے بھی ان کو امیر مقرر کردیا تھا ، لیکن مجھے ان کو معزول کرنا زیادہ بہتر محسوس ہوا، امید ہے کہ یہی ان کے لیے ان کے دین کے حوالے سے بہتر ہوگا۔ میں جب بھی کسی کو امارت (حکمرانی) کے حوالے سے قابل رشک سمجھتا ہوں تو اس کو لشکروں کے امیر میں چن لیتا ہوں۔ پس (اے شرحبیل ! ) میں تم کو (خالد پر) اور اس کے ابن العم (اور دوسرے لوگوں) پرامیر مقرر کرتا ہوں، جب تم کو کوئی ایسا مسئلہ درپیش ہو، جس میں تم کو کسی پرہیزگار خیرخواہ کا مشورہ اور اس کی ضرورت محسوس ہو تو سب سے پہلے ابوعبیدۃ بن الجراح پھر معاذ بن جبل اور پھر خالد بن سعید کو تلاش کرنا۔ بیشک تم کو ان کے پاس نصیحت اور خیر خواہی ملے گی۔ اور ہاں ان لوگوں پر اپنی رائے مسلط کرنے سے گریز کرنا اور ان سے کسی طرح کی خبر چھپانے کی غلطی بھی نہ کرنا۔ ابن سعد