14107 زبیر بن المنذر بن ابی اسید الساعدی سے مروی ہے کہ حضرت ابوبکر (رض) نے سعد بن عبادۃ (رض) کو پیغام بھیجا کہ آؤ اور بیعت میں شامل ہوجاؤ۔ کیونکہ تمام لوگ اور آپ کی قوم والے بھی بیعت کرچکے ہیں۔ حضرت سعد (رض) نے جواب دیا : نہیں، اللہ کی قسم میں بیعت نہیں کروں گا جب تک کہ اپنے ترکش کے سارے تیر نہ آزمالوں اور اپنی قوم اور خاندان کے ساتھ مل کر تمہارے ساتھ جنگ کر کرلوں۔ یہ خبرحضرت ابوبکر (رض) کو ملی تو حضرت بشیر بن سعد (رض) نے فرمایا : اے خلیفہ رسول اللہ ! انھوں نے انکار کردیا ہے اور ہٹ دھرمی تک پہنچ گئے ہیں۔ وہ آپ کی بیعت ہرگز کرنے والے نہیں جب تک ان سے قتال نہ کیا جائے ، ان سے قتال کیا گیا تو ان کی اولاد اور ان کا خاوند بھی جنگ میں کود پڑے گا۔ پھر ان کا قبیلہ خزرج بھی پیچھے نہ رہے گا خزرج کا حلیف اوس ہے وہ بھی لازماً شریک جنگ ہوجائے گا۔ لہٰذا آپ سعد بن عبادۃ کو چھیڑیں ہی ناں۔ کیونکہ آپ کی حکومت مضبوط ہوچکی ہے وہ آپ کو نقصان نہیں پہنچا سکتے اور وہ اکیلے آدمی ہیں جو چھوڑ دیئے گئے ہیں۔
چنانچہ حضرت ابوبکر (رض) نے بشیر (رض) کی نصیحت کو قبول کیا اور سعد کو (ان کے حال پر) چھوڑ دیا۔
پھر جب حضرت عمر (رض) خلیفہ بنے تو سعد بن عبادہ (رض) ان کو ایک دن مدینے کے راستے میں برسراہ ملے۔ حضرت عمر (رض) نے فرمایا : اے سعد ! بولو ! سعد (رض) نے فرمایا : اے عمر ! تم بولو۔ حضرت عمر (رض) نے فرمایا : تم ایسے شخص۔ ابوبکر (رض) کے ساتھی ہو جو ان کے ساتھی نہ بن سکے۔ حضرت سعد (رض) نے فرمایا : ہاں میں ایسا ہی ہوں ۔ اب حکومت کی باگ تمہارے ہاتھ میں آگئی ہے، حالانکہ اللہ کی قسم تمہارے پہلے ساتھی تم سے زیادہ ہم کو پسند تھے۔ اللہ کی قسم ہم تو تمہارے پڑوس کو بھی اچھا نہیں سمجھتے۔ حضرت عمر (رض) نے فرمایا : جو شخص اپنے پڑوسی کے پڑوس کو اچھا نہیں سمجھتا وہاں سے منتقل ہوجاتا ہے۔ حضرت سعد (رض) بولے : میں بھی اس بات کو نہیں بھولوں گا اور تم کو چھوڑ کر تم سے اچھے پڑوسی کا پڑوس اختیار کروں گا۔
چنانچہ تھوڑا عرصہ بعد حضرت سعد (رض) خلافت عمر (رض) کے شروع میں ہجرت کرکے ملک شام (جہاد کی غرض سے) چلے گئے اور وہاں جو ران مقام پر انھوں نے وفات پائی۔ (رض) وارضاء عفاعلیہ۔
ابن سعد