14113 عبدالرحمن بن عوف (رض) سے مروی ہے کہ حضرت ابوبکر (رض) نے اپنے مرض الوفات میں ان کو فرمایا : مجھے تین چیزوں کے کرنے کا افسوس ہے ، کاش میں ان کو نہ کرتا ۔ تین چیزوں کے نہ کرنے کا افسوس ہے۔ کاش میں ان کو انجام دیدیتا اور تین چیزوں کے متعلق میری خواہش تھی کہ کاش میں نبی اکرم (صلی اللہ علیہ وآلہ وسلم) سے ان کے متعلق سوال کرلیتا۔
بہرحال وہ تین چیزیں جو میں نے انجام دیں کاش کہ میں ان کو نہ کرتا ، کاش میں فاطمہ کا درواہ نہ کھولتا اور اس کو چھوڑ دیتا اگرچہ لوگوں نے اس کو جنگ پر بند کردیا تھا (یعنی فاطمہ کی مخالفت نہ کرتا) کاش سقیفہ کے روز حکومت کی باگ ڈور دو آدمیوں میں سے کسی ایک کی گردن میں ڈال دیتا ابوعبیدۃ (رض) بن الجراح یا عمر (رض) ۔ پس ان میں سے کوئی بھی امیر بن جاتا اور میں ان کے لیے محض وزیر (مددگار) ہوتا۔ اور کاش کہ جب میں نے خالد کو مرتدین کے خلاف لشکر کشی کے لیے بھیجا تو میں وہ قصہ تمام کردیتا اگر مسلمان غالب آجاتے تو ٹھیک ورنہ میں لڑائی میں اور لشکروں کو مدد بہم پہنچانے میں مصروف رہتا۔
اور وہ تین چیزیں مجھ سے چھوٹ گئیں کاش کہ میں ان کا انجام دے لیتا جب اضعث بن قیس کو میرے پاس قیدی حالت میں پیش کیا گیا تو مجھے اسی وقت اس کی گردن اڑا دینا چاہیے تھے، کیونکہ مجھے خیال گزرا تھا کہ یہ شخص کسی بھی شرکو دیکھے گا تو میں اس کی مدد کرے گا۔ جب میرے پاس فجاوۃ کو لایا گیا تو کاش میں نے اس کو جلایا نہ ہوتا بلکہ یا تو عمدہ طریقے سے قتل کردیا ہوتا یا پھر اس کو آزاد کردیتا۔ اور کاش کہ جب میں نے ملک شام کی فتوحات کے لیے خالد کو بھیجا تھا اسی وقت عمر کو عراق کی طرف فتوحات کے لیے روانہ کردیا ہوتا تو میرے دونوں ہاتھ دائیں اور بائیں اللہ کی راہ میں برسرپیکار ہوجاتے۔ اور وہ تین باتیں جن کا مجھے رسول اللہ (صلی اللہ علیہ وآلہ وسلم) سے سوال کرلینا تھا ایک تو مجھے یہ سوال کرنا تھا کہ یہ حکومت کی باگ ڈور کن لوگوں کے ہاتھ میں رہنی چاہیے تاکہ پھر ان سے کوئی اس کے بارے میں نزاع نہ کرے، نیز میری خواہش تھی کہ میں یہ سوال بھی آپ سے پوچھ لیتا کہ کیا انصار کو بھی اس حکومت میں لیا جائے ؟ اور یہ سوال بھی ضروری تھا کہ پھوپھی اور بھانجی کی میراث کے متعلق کیا حکم ہے۔ میرے دل میں میراث کے متعلق ان دونوں کا خیال رہتا ہے۔ ابوعبیدہ فی کتاب الاموال، العقیلی فی الضعفاء، فضائل الصحابۃ لجشۃ بن سلمان الطرابلسی، الکبیر للطبرانی، ابن عشاکر، السنن لسعید بن منصور
فائدہ : یہ حدیث حسن ہے ، مگر اس میں حضور (صلی اللہ علیہ وآلہ وسلم) سے مروی کوئی بات نہیں ۔ اس کو امام بخاری (رح) نے کلام الصحابۃ میں تخریج کیا ہے۔