14127 ابومعشر زیاد بن کلیب، ابراہیم سے روایت کرتے ہیں کہ جب نبی اکرم (صلی اللہ علیہ وآلہ وسلم) کی روح قبض ہوگئی تو اس وقت حضرت ابوبکر (رض) وہاں موجود نہ تھے۔ پھر بعد میں وہ تشریف لائے۔ تاہنوز کسی کو جرات نہ ہوئی تھی کہ رسول اللہ (صلی اللہ علیہ وآلہ وسلم) کے چہرے کو کھول کر دیکھ سکتا۔ حضرت ابوبکر (رض) نے آپ کے چہرہ کو کھولا، آپ کی (پرنور) پیشانی کو بوسہ دیا اور (فرط گریہ سے) بولے : آپ پر میرے ماں باپ فدا ہوں، آپ نے زندگی بھی اچھی کاٹی اور موت بھی اچھی پائی۔
انصار سقیفہ بنی ساعدہ ۔ کے مقام پر جمع ہوچکے تھے تاکہ (اپنے سردار) سعد بن عبادہ کی بیعت کرلیں۔ حضرت ابوبکر (رض) نے انصار کو فرمایا : امراء ہم میں سے ہوں گے اور وزراء تم بنو گے۔
پھر حضرت ابوبکر (رض) نے فرمایا : میں تم سب مسلمانوں کے لیے دو آدمیوں پر مطمئن ہوں عمر یا ابوعبیدۃ۔ کیونکہ ایک مرتبہ نبی اکرم (صلی اللہ علیہ وآلہ وسلم) کے پاس ایک قوم آئی تھی، انھوں نے آپ (صلی اللہ علیہ وآلہ وسلم) سے سوال کیا کہ ہمارے ساتھ ایک امین (امانت دار) شخص بھیج دیں جو امانت کا حق ادا کرسکے۔ چنانچہ حضور اکرم (صلی اللہ علیہ وآلہ وسلم) نے ان کے ساتھ ابوعبیدۃ کو بھیجا تھا۔ پس میں بھی تمہارے لیے ابوعبیدۃ پر راضی ہوں۔ حضرت عمر (رض) نے لوگوں کو مخاطب ہو کر فرمایا : تم میں سے کس کا دل یہ بات گوارا کرے گا کہ ان قدموں کو اپنے پیچھے چھوڑ دے جن کو حضور اکرم (صلی اللہ علیہ وآلہ وسلم) نے آگے کیا تھا چنانچہ یہ کہہ کر حضرت عمر (رض) نے حضرت ابوبکر (رض) کی بیعت فرمالی اور پھر دوسرے لوگوں نے بھی ان کی بیعت کرلی۔ ابن جریر