14159 (مسند ابی بکر (رض)) حضرت عمر (رض) سے مروی ہے کہ جب عرب قبائل مرتد ہوگئے۔ اور مہاجرین کی رائے ایک ہوگئی جن میں میں بھی شامل تھا، تو ہم نے عرض کیا : اے خلیفہ رسول اللہ ! لوگوں کو چھوڑ دیئے وہ نماز پڑھتے رہیں اور زکوۃ ادا کرتے رہیں کیونکہ اگر ایمان ان کے دلوں میں داخل ہوگا تو وہ اس کا اقرار بھی کرلیں گے۔ حضرت ابوبکر (رض) نے فرمایا : قسم ہے اس ذات کی جس کے ہاتھ میں میری جان ہے ! اگر میں آسمان سے نیچے گر جاؤں تو یہ مجھے اس بات سے زیادہ محبوب ہے کہ ایسی بات چھوڑ دوں جس پر رسول اللہ (صلی اللہ علیہ وآلہ وسلم) نے قتال کیا تھا۔ میں بھی اس پر ضرور قتال کروں گا ۔ چنانچہ آپ (رض) نے عرب مرتدین سے قتال کیا حتیٰ کہ وہ اسلام کی طرف لوٹ آئے۔ حضرت عمر (رض) نے ارشاد فرمایا : قسم ہے اس ذات کی جس کے ہاتھ میں میری جان ہے ابوبکر کا وہ ایک دن عمر کی ساری آل سے بہتر ہے۔ العدنی