14175 ابوسلمۃ بن عبدالرحمن، محمد بن ابراہیم بن الحارث الیتمی اور عبداللہ بن البہی ان حضرات کے کلام کا خلاصہ ہے کہ :
جب حضرت ابوبکرصدیق (رض) کی وفات کا وقت قریب آگیا تو انھوں نے عبدالرحمن بن عوف کو بلایا اور فرمایا : مجھے عمر بن خطاب کے متعلق رائے دو ۔ حضرت عبدالرحمن نے فرمایا : آپ جس بات کے متعلق مجھ سے پوچھ رہے ہیں، آپ مجھ سے زیادہ اس کو بخوبی جانتے ہیں۔ حضرت ابوبکر (رض) نے فرمایا : پھر بھی تم کہو۔ حضرت عبدالرحمن (رض) نے فرمایا : اللہ کی قسم ! وہ آپ کی رائے سے بھی بڑھ کر افضل ہیں۔ پھر حضرت ابوبکر (رض) نے عثمان (رض) بن عفان کو بلایا اور فرمایا : مجھے عمر کے متعلق اپنی رائے دو ۔ حضرت عثمان (رض) نے عرض کیا : آپ ہم سے زیادہ ان کے متعلق خبر رکھتے ہیں۔ حضرت ابوبکر (رض) نے فرمایا : اس کے باوجود تم کہو اے ابوعبداللہ ! حضرت عثمان بن عفان (رض) نے عرض کیا : اللہ گواہ ہے، میں ان کے متعلق یہی علم رکھتا ہوں کہ ان کا باطن ان کے ظاہر سے اچھا ہے اور ہمارے درمیان ان جیسا۔ اچھا کوئی نہیں ہے۔ حضرت ابوبکر (رض) نے فرمایا : اللہ آپ رحم فرمائے۔ اللہ کی قسم ! اگر تم ان کا ذکر چھوڑ دیتے تو میں تمہاری مخالفت نہ کرتا۔ ان کے ساتھ حضرت ابوبکر (رض) نے ابوالا عور سعید بن زید، اسید بن حفیر اور دیگر مہاجرین اور انصار صحابہ رضوان اللہ علیہم اجمعین سے بھی مشورہ کیا۔ حضرت اسید نے فرمایا : اللہ جانتا ہے میں ان کو آپ کے بعدسب سے بہتر سمجھتا ہوں جو رضائے الٰہی کے لیے راضی ہوتے ہیں اور پروردگار کی ناراضگی کی وجہ سے ناراض ہوتے ہیں۔ نیز ان کا اندر باہر سے اچھا ہے ، اس لیے اس حکومت پر ان سے بڑھ کر کوئی قوی شخص نہیں آسکتا۔
بعض صحابہ کرام نے عبدالرحمن اور عثمان کے حضرت ابوبکر (رض) کے پاس داخل ہونے کی اور تنہائی میں ان کے مشورہ کرنے کی خبر سنی تو وہ بھی حضرت ابوبکر (رض) کے پاس حاضر ہوگئے۔ ان میں سے ایک نے عرض کیا : اگر آپ کا پروردگار آپ سے پوچھ لے کہ آپ ہم پر عمر کو خلیفہ کیوں بنا کر آئے ہیں تو آپ اپنے رب کو کیا جواب دیں گے ؟ حالانکہ آپ ان کی سخت مزاجی کو خوب جانتے ہیں، حضرت ابوبکر (رض) نے ارشاد فرمایا : مجھے بٹھا دو (پھر) فرمایا : کیا مجھے اللہ کا خوف دلاتے ہو، ستیاناس ہو اس کا جو تمہاری حکومت سے متعلق ظلم کا فیصلہ کرے۔ میں کہوں گا : اے اللہ ! میں نے ان پر تیرے بندوں میں سے سب اچھے کو خلیفہ چنا ہے۔ تم اپنے پیچھے والوں کو بھی میری طرف سے یہ خبر سنادینا۔ پھر حضرت ابوبکر (رض) کروٹ پر لیٹ گئے پھر آپ (رض) نے عثمان بن عفان (رض) کو بلایا اور فرمایا : لکھو :
بسم اللہ الرحمن الرحیم
یہ وہ عہد نامہ ہے جو ابوبکر بن ابی قحافہ نے اپنی زندگی کے آخر میں دنیا سے نکلتے ہوئے اور اپنی اخروی زندگی کے شروع میں اس کے اندر داخل ہوتے ہوئے کہا ہے، جس وقت کہ کافر بھی ایمان لے آتا ہے، فاجر (بھی خدا پر) یقین کرلیتا ہے، جھوٹا بھی سچ بولتا ہے، کہ میں اپنے بعدتم پر عمر بن خطاب کو خلیفہ منتخب کرتا ہوں، تم ان کی بات سننا اور ان کی اطاعت بجا لانا۔ میں نے (اس معاملے میں) اللہ سے، اس کے رسول سے، اس کے دین سے، اپنی جان سے اور تم سے بھلائی کرنے میں کوئی کوتاہی نہیں برتی ہے۔ پس اگر وہ عدل و انصاف کرے گا تو یہی میرا اس کے متعلق گمان ہے اور یہی میں اس کے بارے میں جانتا ہوں۔ لیکن اگر وہ بدل جائے تو ہر انسان جو گناہ کرتا ہے اس کا خود ذمہ دار ہے۔ میں نے تو خیر کا ہی ارادہ کیا ہے اور میں غیب کا علم نہیں رکھتا۔
وسیعلم الذین ظلموا ای منقلب ینقلبون۔
اور عنقریب وہ لوگ جنہوں نے ظلم کیا جان لیں گے کہ کس کروٹ پر پلٹتے ہیں۔
پھر آپ (رض) نے تحریر پر مہر لگانے کا حکم دیا۔
بعض راوی کہتے ہیں : جب حضرت ابوبکر (رض) نے تحریر کا پہلا حصہ کھلوالیا اور ابھی عمر (رض) کا ذکر باقی تھا کہ آپ (رض) پر بےہوشی طاری ہوگئی ابھی آپ نے کسی کا نام نہیں لکھوایا تھا۔ چنانچہ حضرت عثمان (رض) نے خود ہی لکھ دیا کہ ” میں عمر بن خطاب کو خلیفہ چنتا ہوں “ پھر حضرت ابوبکر (رض) کو بھی ہوش آگیا۔ آپ (رض) نے حضرت عثمان (رض) کو فرمایا : تم نے کیا لکھا ہے پڑھ کر سناؤ، چنانچہ حضرت عثمان (رض) نے ساری تحریر اور عمر (رض) کا نام بھی پڑھ کر سنادیا۔ حضرت ابوبکر (رض) نے اللہ اکبر کا نعرہ مارا اور ارشاد فرمایا : میرے بےہوش ہوجانے پر تم کو میری جان کا خطرہ ہوگیا اور لوگوں کے اختلاف میں پڑجانے کا خطرہ تم نے بھانپ لیا۔ اللہ تم کو اسلام اور اہل اسلام کی طرف سے اچھا بدلہ نصیب کرے۔ اللہ کی قسم ! تم خود بھی اپنا نام لکھنے کے اہل تھے۔ تم سے اسی اچھائی کی توقع تھی۔
چنانچہ (تحریر مکمل کرنے اور مہر کرنے کے بعد آپ (رض)) نے حکم دیا اور حضرت عثمان (رض) تحریر لے کر باہر آئے۔ آپ (رض) کے ساتھ حضرت عمر بن خطاب اور اسید بن سعید القرظی بھی تھے۔ حضرت عثمان (رض) نے لوگوں سے پوچھا : کیا تم بیعت کرتے ہو اس شخص کی جس کا نام اس خط میں ہے ؟ لوگوں نے کہا : ہاں، سب نے اس کا اقرار کیا، اس پر راضی ہوگئے اور اس پر بیعت بھی کرلی ۔ پھر حضرت ابوبکر (رض) نے حضرت عمر (رض) کو تنہائی میں بلایا اور نصیحتیں اور وصیتیں کیں جو بھی کیں۔ پھر حضرت عمر (رض) آپ کے پاس سے نکل آئے۔ پھر حضرت ابوبکر (رض) نے دونوں ہاتھ آسمان کی طرف پھیلا کر دعا کی :
اے اللہ ! میں نے اس میں ان لوگوں کی خیر کا ارادہ کیا ہے، مجھے ان پر فتنے کا خوف تھا، اس لیے میں نے ان میں یہ تقرر کردیا ہے، جس کو آپ خوب جانتے ہیں۔ میں نے ان کے بارے میں اپنی اچھی رائے اختیار کی ہے۔ میں نے ان پر ان کے سب سے اچھے اور سب سے قوی شخص کو والی بنادیا ہے، جو ان میں سب سے زیادہ حریص ہے ان کی بھلائی کا۔ اب میرے پاس آپ کا حکم آچکا ہے آپ ان میں میرے نائب کو بہتر ثابت کیجئے گا۔ یہ سب تیرے بندے ہیں اور ان کی پیشانی آپ کے ہاتھوں میں ہے۔ اے اللہ ! ان کے لیے ان کے والی کو صالح بنادے اور اس والی کو اپنے خلفاء راشدین میں سے بنادے، جو نبی الرحمت کی ہدایت اور صالحین کے طریقے کی پیروی کرے اور ان کی رعایا کو بھی ان کے لیے صالح بنادے۔ ابن سعد