14187 حمید بن ہلال سے مروی ہے کہ ہمیں ایسے شخص نے بیان کیا جو حضرت ابوبکر صدیق (رض) کی وفات کے موقع پر حاضر تھا کہ جب حضرت عمر (رض) حضرت ابوبکر (رض) کی تدفین سے فارغ ہوئے تو ان کی قبر کی مٹی سے اپنے ہاتھ جھاڑے پھر اسی جگہ خطبہ دینے کے لیے کھڑے ہوگئے اور ارشاد فرمایا : اللہ تعالیٰ نے تم کو میرے ساتھ آزمائش میں مبتلاکردیاہی اور مجھے تمہارے ساتھ آزمائش میں ڈال دیا ہے۔ میرے دو ساتھیوں کے چلے جانے کے بعد بھی تمہارے اندر باقی چھوڑ دیا ہے۔ اللہ کی قسم ! تمہارے معاملات کا کوئی کام میری موجودگی میں پیش آیا تو میرے سوا اس کو کوئی حل نہ کرے گا اور اگر میری عدم موجودگی میں تمہارا کوئی مسئلہ در پیش ہوا تو میں کسی صاحب امانت پر اس کی ذمہ داری ڈالنے سے ہرگز نہ کتراؤں گا۔ اگر تم اچھا چلتے رہے تو میں بھی تمہارے ساتھ اچھائی برتوں گا اور اگر لوگوں نے برائی کا راستہ اختیار کیا تو میں ان کو عبرت کا سامان بنادوں گا۔
روای کہتا ہے : اللہ کی قسم حضرت عمر (رض) اسی بات پر قائم رہے حتیٰ کہ دنیا سے جدا ہوگئے۔
ابن سعد، شعب الایمان للبیہقی