14190 حضرت زید بن اسلم اپنے والد سے روایت کرتے ہیں کہ میں حضرت عمر بن خطاب (رض) کے ساتھ بازار کی طرف نکلا۔ حضرت عمر (رض) کو ایک جوان عورت کا سامنا ہوا۔ عورت نے عرض کیا : اے امیر المومنین ! میرا شوہر ہلاک ہوگیا ہے اور چھوٹے چھوٹے بچوں کو چھوڑ گیا ہے۔ اللہ کی قسم ! یہ تو ایک پایہ پکوانے کے قابل بھی نہیں (کما کر لاسکتے) اور نہ ان کے پاس کھیتی اور زمین ہے اور نہ مویشی جانور۔ مجھے ڈر ہے کہ کہیں ان کو بجوہی نہ کھاجائے۔ میں بنت خفاف بن ایماء الغفاری ہوں اور میرے والد خفاف صلح حدیبیہ میں حضور اکرم (صلی اللہ علیہ وآلہ وسلم) کے ساتھ تھے۔
یہ سن کر حضرت عمر (رض) کھڑے ہوگئے اور آگے نہ بڑھے بلکہ فرمایا : خوش آمدید تم تو قریبی نسب والی نکلیں کہ تمہارے باپ کو حضور کے ساتھ صحبت کا شرف حاصل رہا پھر آپ (رض) لوٹے اور ایک بار بردار تگڑے اونٹ کو کھولا جو (بیت المال والے) گھر میں بندھا ہوا تھا۔ پھر اس پر دو بورے رکھ کر طعام اور غلے سے بھرے۔ ان کے درمیان نفقہ (سازوسامان) اور کپڑے وغیرہ رکھے۔ پھر اونٹ کی مہارجاکر عورت کو تھما دی اور فرمایا : یہ اونٹ لو اور یہ سامان تمہارے پاس ختم نہ ہوگا کہ اللہ پاک اور عطا کردے گا۔
ایک آدمی نے حضرت عمر (رض) کو عرض کیا : اے امیر المومنین ! آپ نے اس کو زیادہ مال دیدیا ہے۔ حضرت عمر (رض) نے فرمایا : تیری ماں تجھے روئے۔ اس کا باپ حدیبیہ کے موقع پر حضور (صلی اللہ علیہ وآلہ وسلم) کا شریک تھا۔ اللہ کی قسم ! میں دیکھتا ہوں کہ اس کے باپ اور بھائی نے ایک قلعہ کا طویل زمانے تک محاصرہ کیا تھا جس کو ہم پر اللہ نے فتح کردیا۔ اب ہم اس قلعے سے مال غنیمت حاصل کرتے ہیں تو اس کے باپ اور بھائی کا اس میں کیوں حصہ نہیں ہوگا۔ البخاری، ابوعبیدۃ فی الاموال، السنن للبیہقی