14214 یزید بن ابی حبیب سے مروی ہے کہ حضرت عمر بن خطاب (رض) نے حضرت خالد بن ثابت فہمی کو بیت المقدس کسی لشکر کے ساتھ بھیجا جہاں انھوں نے قتال کیا۔ اس وقت حضرت عمر (رض) (ملک شام کے علاقے ) جابیہ میں تھے۔ اہل فلسطین نے حضرت خالد کو یہ پیش کش کی کہ قلعے کے اندر کا علاقہ ہمارے تصرف میں رہنے دیں اور ہم اس کا بدل (جزیہ کی شکل میں) تم کو دیں گے، جبکہ قلعے سے باہر کا علاقہ تمہارا ہوگا۔ حضرت خالد (رض) نے فرمایا : ہم اس بات پر تمہاری بیعت کرتے ہیں (معاہدہ کرتے ہیں) ، بشرطیکہ اس پر امیر المومنین راضی ہوں۔ چنانچہ خالد نے حضرت عمر (رض) کو صورت حال لکھی۔ حضرت عمر (رض) نے ان کو لکھا کہ تم اپنی اسی حالت پر ٹھہرو میں خود تمہارے پاس چل کر آتا ہوں۔ چنانچہ حضرت خالد قتال سے باز آگئے۔ پھر حضرت عمر (رض) تشریف لائے تو اہل فلسطین نے ان کے لیے بیت المقدس کا دروازہ کھول دیا اسی شرط پر جو وہ خالد سے کرچکے تھے۔ راوی کہتے ہیں چنانچہ یہ فتح حضرت عمر (رض) کی طرف موسوم ہوئی ۔ فتح بیت المقدس علی یدعمر۔ ابوعبید ایضاً