١٤٢٣۔۔ عتبان بن مالک (رض) سے مروی ہے کہ میں رسول اکرم کی خدمت اقدس میں حاضر ہوا اور عرض کیا کہ میں نابیناانسان ہوں ، میرے اور میری قوم کی مسجد کے درمیان کیچڑ وغیرہ کا پانی پڑتا ہے تو میری خواہش ہے کہ آپ میرے گھر تشریف لائیں اور میرے گھر کی مسجد میں ایک مرتبہ نماز ادا فرمادیں تاکہ میں اس مقام کو نماز کے لیے منتخب کرلوں، حضور نے فرمایا ان شاء اللہ کرلوں گا۔ پھر آپ حضرت ابوبکر کے پاس سے گزرے تو حضرت ابوبکر کو آپ نے اپنے ساتھ چلنے کا فرمایا۔ حضرت ابوبکر آپ کے ساتھ چل دیے آپ نے عتبان بن مالک کے گھر پہنچ کر اندر آنے کے لیے اجازت طلب کی پھر اجازت ملنے پر اندر داخل ہوگئے پھر آپ نے بیٹھنے سے قبل دریافت کیا کہ تم کہاں مجھ سے نماز پڑھوانا چاہتے ہو ؟ حضرت عتبان کہتے ہیں کہ میں نے اپنی مطلوبہ جگہ کی طرف اشارہ کردیا پھر نماز سے فراغت کے بعد ہم نے آپ کو خزیرہ گوشت اور آٹے سے تیار شدہ کھانے پر روک لیا، جو ہم نے آپ کے لیے تیار کیا تھا، پھر اہل محلہ کو بھی آپ کی آمد کی اطلاع ہوگئی اور آپ سے ملاقات کی خواہش میں لوگوں کا جم غفیر ہوگیا۔۔ حتی کہ گھرلوگوں سے بھرگیا۔ آپ نے دریافت کیا مالک بن الدخشن یا الدخشین کہاں ہے ؟ مجمع میں سے ایک شخص نے کہا وہ منافق آدمی ہے اللہ اور اس کے رسول سے محبت نہیں رکھتا۔ حضور نے فرمایا ایسامت کہو کیونکہ وہ لاالہ الا اللہ کا قائل ہے اور اس کے ساتھ اللہ کی رضا کا متلاشی ہے لوگوں نے کہا ہم تو یارسول اللہ اس کے چہرے اور اس کی باتوں کو منافقین کی طرف مائل دیکھتے ہیں آپ نے فرمایا ایسا کہنا مناسب نہیں کیونکہ وہ لاالہ الا اللہ کا قئل ہے اور اس کے ساتھ اللہ کی رضا کا طالب ہے لوگوں نے کہا یارسول اللہ بیشک پھر آپ نے فرمایا قیامت کے روز کوئی شخص اللہ کی رضا کے لیے لاالہ الا اللہ کہتا ہوا نہ آئے گا مگر اس کو آگ پر حرام کردیا جائے گا۔ المصنف لعبدالرزاق۔