14237 سائب بن الاقرع سے مروی ہے کہ مسلمانوں کے مقابلہ میں اس قدربڑا لشکر تیار ہوا جس کے مثل پہلے کبھی نہ ہوا تھا۔ اس کی خبر حضرت عمر (رض) کو پہنچی تو انھوں نے مسلمانوں کو جمع کیا، اللہ کی حمدوثناء کی پھر ارشاد فرمایا :
بولو ! مختصر بات کرو، حالات ہم پر مشکل صورت میں آگئے ہیں، ہمیں معلوم نہیں ہورہا کس طرف سے ان کو سنبھالیں۔ پھر آپ (رض) نے ان کو دشمنوں کے بڑی تعداد میں جمع ہونے کی خبر سنائی۔ پھر طلحہ (رض) نے اٹھ کر تقریر کی، پھر زبیر (رض) نے تقریر کی، پھر عثمان (رض) نے اٹھ کر تقریر کی اور طویل گفتگو پھر حضرت علی (رض) کھڑے ہوئے اور فرمایا : اے امیر المومنین ! یہ آنے والے دشمن بتوں کی عبادت کرنے والے ہیں، اور اللہ پاک ان کے برے کاموں کو بدلنے میں سب سے زیادہ سخت ہیں۔ میرا خیال ہے کہ آپ اہل کوٹہ کو لکھیں کہ ان کے دو تہائی افراد جہاں کے لیے کوچ کریں اور ایک تہائی افراد ان کے پیچھے اہل و عیال کی نگہداشت کریں اسی طرح اہل بصرہ کی طرف پیغام بھیجیں وہ بھی ایک لشکر کی تیاری کریں۔
حضرت عمر بن خطاب (رض) نے فرمایا : مجھے مشورہ دو ، میں اس لشکر پر کس کو امیر مقرر کروں ؟ لوگوں نے عرض کیا : امیر المومنین ! آپ ہمارے درمیان رائے میں سب سے افضل ہیں اور اپنے اہل کو ہم میں سب سے زیادہ جاننے والے ہیں۔
حضرت عمر بن خطاب (رض) نے ارشاد فرمایا : میں ان پر ایسے شخص کو امیر مقرر کروں گا جو پہلے نیزے پر ہی دشمن سے جاٹکرائے گا۔
اے سائب بن اقرع ! میرا یہ خط لے کر نعمان بن مقرن کے پاس جاؤ۔ اور اس کو حکم دو جیسا کہ حضرت علی (رض) نے ارشاد کیا ہے، پھر فرمایا : اگر نعمان شہید ہوجائیں تو پھر اس لشکر کے امیر حذیفہ بن یمان ہوں گے ، اگر حذیفہ بھی شہید ہوجائیں تو جریر بن عبداللہ امیر ہوں گے۔ اگر اسلامی لشکر فتح یاب ہوجائے تو اے سائب ! تمہاری ذمہ داری ہے کہ مسلمانوں کو جو مال غنیمت ہاتھ لگے تو کوئی ناحق مال میرے پاس لاؤ نہیں اور جس کا حق بنتا ہو اس کے مال کو اس سے روکو نہیں۔
سائب کہتے ہیں : چنانچہ میں حضرت عمر (رض) کا خط لے کر نعمان (رض) کے پاس گیا ۔ وہ اہل کوفہ میں سے دو تہائی اکثریت کو لے کر چل دیئے۔ پھر اہل بصرہ کو پیغام بھیج دیا پھر ان کو بھی ساتھ کرلیا اور نہاوند میں جاکر دشمن سے مڈبھیڑ ہوئی۔ پھر سائب (رض) نے واقعہ نہاوند پوری تفصیل کے ساتھ بیان کیا۔ نعمان اس جنگ میں سب سے پہلے شہید ہوئے۔ پھر حضرت حذیفہ (رض) نے جھنڈا تھام لیا اور پھر اللہ نے مسلمانوں کو فتح نصیب فرمادی۔
سائب کہتے ہیں میں نے اموال غنیمت کو جمع کیا اور مسلمانوں کے درمیان تقسیم کردیا۔ پھر میرے پاس ذوالعیشین آئے اور بولے کہ نخیر جان کر خزانہ قلعہ میں ہے۔ میں قلعہ میں چڑھ کر گیا تو وہاں موتیوں کی دو ٹوکریاں رکھی تھیں۔ ایسا خزانہ میں نے کبھی نہیں دیکھا تھا۔ اب میں نے ان کو مال غنیمت بھی نہیں سمجھا جو سپاہیوں کے درمیان تقسیم کردیتا اور نہ میں نے ان کو جزیہ کے بدلے حاصل کیا تھا۔ اور ابوعبیدراوی کو شک ہے وہ فرماتے ہیں یاسائب نے یہ فرمایا کہ ان کو میں نے حاصل کیا تھا۔ بہرصورت میں حضرت عمر (رض) کے پاس آیا ابھی ان کو فتح کی خوشخبری نہ ملی تھی آپ مدینے کے گشت پر تھے، دوران گشت لوگوں سے پوچھ گچھ فرما رہے تھے۔ مجھے دیکھا تو بول پڑے : دہت تیرے کی، ابن ملیکہ ! (سائب) تیرے پیچھے کا کیا حال ہے ؟ میں نے عرض کیا : یا امیر المومنین وہی حال ہے جو آپ چاہتے ہیں پھر سائب نے سارا واقعہ گوش گزار کیا اور نعمان کی شہادت کی خبر سنائی اور مسلمانوں کی فتح کی خوشخبری اور ہیروں کی ٹوکریوں کی خوشخبری بھی سنائی۔ حضرت عمر (رض) نے فرمایا : ان دونوں ٹوکریوں کو لے جاؤ خواہ ایک درہم یا اس سے کم یا زیادہ میں کیوں نہ ہو ان کو فروخت کردو اور مسلمانوں کے درمیان ان کو تقسیم کردو سائب کہتے ہیں : چنانچہ میں ان ٹوکریوں کو لے کر کوفہ گیا، میرے پاس ایک قریشی جوان آیا جس کو عمر بن حریث کہا جاتا تھا اس نے دونوں ٹوکریوں کو خرید لیا اور سارے سپاہیوں اور ان کی اولاد کے بقدر کثیر درہم دیئے۔ پھر اس نے بھی ایک ٹوکری اتنی ہی قیمت میں حیرہ جاکر فروخت کردی جتنی قیمت میں اس نے دونوں ٹوکریاں خریدی تھیں۔ یہ اس کی پہلی کمائی تھی جو اس کو اتنا مال دے گئی۔ ابوعبید فی الاموال